Арассыыйаҕа биллэр астролог Василиса Володина үүнэр 2022 сылга Зодиак бары бэлиэлэригэр анаан билгэлээһини оҥордо. Баабыр сылыгар ситиһиилэнэр, олох уйгутун тупсарар туһуттан, туохха болҕомто ууруллуохтааҕый, ханнык дьайыыттан аккаастанар ордугуй?
Хой
Сыл саҥатыттан үгүс түбүктээх, кэлиилээх-барыылаах кэм кэлиэ. Элбэх үлэ күүтэр. Онуоха ыксаабакка, холкутуйан, сымнаан биэрэр эрэйиллэр. Сынньанары, доруобуйаны көрүнэри умнумаҥ. Саас-сайын Хой бэлиэлээхтэргэ үтүө сонуннардаах, бэйэни биллэрэргэ бэртээхэй кэм үүнүө. Сыл бүтэһигэр саҥа билсиһиилэр баар буолуохтара, маны мүлчү туппакка, табыгастаахтык эргиттэххитинэ, ситиһии кэлиэ. Оттон дьиэ кэргэҥҥэ нус-хас олох, сылаас сыһыан, тапталга билинии күүтэр. Ыал буоларга, оҕолонорго үчүгэй кэм эбит. Тапталларын көрсө илик Хойдорго быһаарыныылаах кэм кэлбит, ону мүлчү тутумаҥ.
Оҕус
Үлэҕэ, карьераҕа ситиһиилэниэххитин баҕарар буоллаххытына, бу саас элбэх сыраҕытын ууруоххутун наада. Эрдэттэн толкуйдаан, анааран, сүбэлэттэрэн баран, оҥорор ордук. Бу кэмҥэ элбэх эниэргийэлээх, эрчимнээх буолуоххут, онон ханнык баҕарар дьыаланы кыайыаххыт. Бэйэ дьыалатын арынарга, улахан атыыны ыларга тоҕоостоох кэм. Онтон сайын диэки тапталлааххытын кытары сыһыаҥҥытын бөҕөргөтүөххүт, көрсө илик дьоҥҥо саҥа билсиһии тосхойуо. Күһүөрү иммунитет мөлтөөн, доруобуйаҕытыгар охсууну ылыаххытын сөп. Онон сайыҥҥыттан саҕалаан, спордунан дьарыктанан, куһаҕан дьаллыктартан аккаастанан, аһы-үөлү көрүнэн, доруобуйаҕытын бөҕөргөтүөххүтүн наада.
Игирэлэр
Бу сыл Игирэлэр айар дьоҕурдарын арыйыахтарын, дьоҥҥо көрдөрүөхтэрин наада. Онуоха араас маастар-кылаастарга сылдьан, талааннаах дьону кытары алтыһан, саҥа дьарыгы таба тайаныаххыт. Бэйэҕит ис куоласкытын истиҥ. Оччоҕо ситиһии сиэттиһиэҕэ уонна интэриниэт эйгэтигэр бэйэҕитин биллэрэргитигэр табыгастаах буолуо. Баабыр сыла урукку бырайыактары түмүктүүргэ тоҕоостоох. Соҕотох сылдьар Игирэлэр саҥа билсибит киһилэрэ атын кубулҕат буолан хаалыан сөп, албынтан сэрэниҥ. Ыйааһын түһэрэргэ, дьэ, кэмэ кэлбит, ону табан дьаһаннаххытына, доруобуйаҕыт да көнүөҕэ. Элбэхтик таһырдьа сылдьыҥ, дьону кытары билсиҥ, бэйэҕитин сайыннарыҥ.
Араак
Сыл саҥатыгар үп-харчы өттүгэр кыһалҕалар баар буолуохтара. Үгүс түбүк-садьык күүһү-күдэҕи өһүлүөн сөп, ол эрээри, сааһыары барыта оннун булуо. Сайынын эбии дохуот кэлэн, үөрдүө. Онон саҥа бырайыагы саҕалыырга кыах үөскүө. Бу кэми бэйэни сайыннарарга аныыр тоҕоостоох. Сайыҥҥы уоппуска умнуллубат түгэннэри бэлэхтиэ. Ол курдук, кэрэ айылҕалаах сиргэ айан, саҥа билсиһиилэр баар буолуохтара. Уруккуттан ыра санаа оҥостубут дьыалаҕыт табыллыан сөп. Биллэн турар, кэтэһэн баран олордоххо, туох да ытыска бэйэтэ кэлэн түспэт, үлэлиэххэ-хамсыахха, сүүрүөххэ-көтүөххэ наада. Манна биир үрдүк дуоһунастаах киһи көмөлөһүөҕэ.
Хахай
Үлэҕэ хайҕаныы, салалта өттүттэн билинии сыл саҥатыгар күүтэр. Ону туһанан, карьера кирилиэһинэн өрө тахсар, саҥа бырайыактары олоххо киллэрэр кыах үөскүө, ону мүлчү тутумуохха наада. Ол эрээри бу кэмҥэ ордугургуур дьон аллараа тарда сатыахтарын сөп. Онон үчүгэйдик билбэт дьоҥҥутугар итэҕэйимэҥ, ис санааҕытын арыйымаҥ. Баҕарбыккытын барытын атыыласпакка, харчыны матайдаабакка, туох эрэ улахан сыалга уурунар ордук. Бэйэҕит да сөҕүөххүт, барыта кыаллар эбит диэн. Дьиэ кэргэҥҥэ кыра иирсээн баар да буоллаҕына, ону дириҥэппэккэ, тута быһаарсан, алы гынан иһиҥ. Бу кэнниттэн истиҥ сыһыан дириҥээн биэриэҕэ.
Кыыс
Сааскы күн уһаан истэҕин аайы, тупсан, киэркэйэн иһэр курдук буолуоххут, тулалыыр дьон ону сэрэйэн, эһиэхэ тардыһыахтара. Саҥа билсиһиилэр-көрсүһүүлэр элбиэхтэрэ. Урукку доҕотторгутун, чугас дьоҥҥутун да умнумаҥ. Төрөөбүт күҥҥүтүгэр олус үчүгэй бэлэҕи тутуоххут, дохуоккут да үрдүө. Ол эрээри, харчыны бүтэрэ охсорго ыксаамаҥ, уруккуттан баҕарбыт атыыгытын ылар түгэн тосхойуо. Үлэлииргитин сөбүлүүр дьоҥҥут, ол эрээри, сынньанары да умнумаҥ. Атын дьон туох диирин буолбакка, тус бэйэҕит тугу баҕараргытын, эһиэхэ туох туһалаах буолуоҕун толкуйдааҥ. Манна үчүгэй психолог суолгутун ыйан-кэрдэн биэриэҕэ.
Ыйааһын
Саас Ыйааһыннары тургутар түгэн үөскүөҕэ. Онон өр соҕус ыйааһын бэскитинии биэтэҥнии сылдьыбакка, улахан быһаарыныы ылынар кэмҥит кэлиэ. Холобур, үрдүк хамнастаах, кэскиллээх үлэ көстүө, эбэтэр атын сиргэ көһөн барыаххытын сөп. Тус олоххо улахан уларыйыы суох, барыта кэминэн. Соҕотох сылдьар Ыйааһыннар саҥа билсиһиилэрэ түмүгэ суох буолуохтара, бигэ сыһыаҥҥа аҕалбат. Алтынньы-сэтинньи ыйдарга иммунитеты бөҕөргөтөргө табыгастаах кэм. Күннээҕи эрэсиими уларытан, кэмигэр сөпкө утуйары ситиһиэххэ наада. Баабыр сыла бүтэһигэр Ыйааһыннары маанылыаҕа, дьоллоох түгэннэри тосхойуоҕа.
Скорпион
Кыһыҥҥы ыйдарга доруобуйаҕытын көрүнүөххүтүн наада. Ыарыы биллэрин кэтэспэккэ, бырааска баран көрдөрүнүҥ, бэрэбиэркэлэниҥ. Эрдэттэн эмтээбэтэххэ, ыарыы олоҕурбут көрүҥҥэ көһүөн сөп. Саҥа бырайыактарга кыттарга этиилэр киириэхтэрэ. Быһаарыныы ылыныаххыт иннинэ, барытын ыараҥнатан көрүҥ, үчүгэйдик толкуйдааҥ. Куһаҕан санаалары, урукку хомолтону, хоргутууну, кутталы суох гыннаххытына, ыраастанан, олоххут саҥа эргиирэ саҕаланыа этэ. Санныгытыттан сүүгэһэри илгибит курдук сананыаххыт, чэпчиэххит. Исписэлиистэр көмөлөрүттэн аккаастанымаҥ. Сыл бүтүүтэ үп-харчы өттүнэн балаһыанньаҕыт көнүө.
Охчут
Быйыл Охчуттарга бары өттүнэн бэртээхэй, бааттаах сыл буолуо. Үлэҕэ-хамнаска табыллыы, ситиһии баар буолуо. Саҥа кыахтар арыллыахтара, дьон билиниитэ кэлиэ, сыраҕытын сыаналыахтара, харчынан бириэмийэ да тумнуо суоҕа. Онон кыаххыт иһинэн тиргиччи үлэлээн-хамсаан хаалыҥ. Сыл иккис аҥаарыттан сынньалаҥҥа баран, дьиэ кэргэҥҥитигэр, төрөппүттэргитигэр болҕомтону ууруҥ. Аҥаардарын була илик Охчуттар аналларын көрсүөхтэрин сөп. Тапталга куустарар саҕа үчүгэй туох баар буолуой? Кэрэ аҥаардар сэбэрэҕитин тупсарарга кыһаллыҥ, онтон эр дьон үлэлээн-хамсаан, бэйэҕитин көрдөрүҥ. Кэмигэр сынньанары, айылҕаттан күүс ылары умнумаҥ.
Козерог
Үүнэр сыл бастакы үс ыйдарыгар Козерогтарга ситиһиилээх кэм буолуо. Үлэһит дьоҥҥо саҥа бырайыактары олоххо киллэрэргэ, бэйэ дьыалатын үлэлэтэргэ тоҕоостоох кэм. Кими да күүппэккэ, бэйэ күүһүгэр эрэнэн, санаабыты оҥорон иһиэххэ наада. Ону тэҥэ, таптал долгунугар куустарыаххыт. Бэйэҕитигэр саҥа арыйыылары оҥоруоххут. Холобур, хаһан да сатыам суоҕа диэбиккит, табыллан хаалыа. Быйыл сынньалаҥы кытары сибээстээх айан күүтэр. Күһүөрү доруобуйаҕытын үчүгэйдик көрүнүөххүтүн наада. Дьиэ кэргэҥҥитигэр болҕомтоҕут тиийбэт, ону толоро сатааҥ. Оҕолор саҥа иэйиини, ураты туругу бэлэхтиэхтэрэ.
Күрүлгэн
Төрөөбүт күннэрин чугаһыгар Күрүлгэн бэлиэлээхтэр тапталлаахтарын көрсөн, уһун, дьоллоох сыһыаны олохтуур кыахтаныахтара. Кэргэннээх Күрүлгэннэр сыһыаннара дириҥиэҕэ, бэйэ-бэйэни өйдөһүү, өйөһүү улаатыаҕа. Чуолаан кэргэҥҥит олоххутугар саамай улахан өйөбүлү оҥоруоҕа. Онон иллэҥ кэмҥитин, сынньалаҥҥытын бииргэ атаарыҥ. Дьонтон, баантан иэс ылымаҥ уонна улахан атыыны атыылаһымаҥ. Күһүөрү онтон сылтаан үп-харчы өттүнэн ыарахаттары көрсүөххүтүн сөп. Сискитин, сүһүөххүтүн харыстаныаххытын наада. Уопсайынан, эт-хаан, өй-санаа өттүнэн да олус ноҕуруускаланартан туттуна сатааҥ.
Балыктар
Баабыр сылын саҕаланыыта идэни баһылааһыҥҥа, үлэҕэ-хамнаска бэлиэтэнэргэ, саҥа бырайыактары олоххо киллэрэргэ табыгастаах кэм. Онуоха ыарахаттар баар да буоллахтарына, ону барытын кыайыаххыт. Уһун сынньалаҥ кэмигэр бырайыак идиэйэтин үчүгэйдик толкуйдаан, илдьиритэн, олоххо киллэрэргэ олугун оҥоруҥ. Элбэх идиэйэлээх эрээри, ону олоххо киллэрэргэ, харчыга кубулутарга кыһалҕалары көрсөр эбиккит. Кэлиэгэлэргит үчүгэй сүбэни биэриэхтэрэ. Ону тэҥэ, исписэлиистэртэн үөрэниҥ, куурустарга сылдьыҥ. Сайын үп-харчы өттүгэр балаһыанньа тупсар. Өртөн баҕарбыт баҕа санааҕыт олоххо киириэн сөп. Барыта бэйэҕититтэн тутулуктаах. Бу сыл доруобуйаҕытын үчүгэйдик көрүнүҥ, сааскыттан саҕалаан, хааман, сүүрэн, спортивнай саалаҕа сылдьан, эппиэтинэһи бэйэҕит илиигитигэр ылыҥ. Тус олоххо улахан уларыйыы суох.
Ангелина Васильева, «Саха си рэ» хаһыат, edersaas.ru
Хаартыска: goroskop.ru