Сүрүн Уопсастыба

Гороскоп: Баабыр сыла тугу тосхойор?

2022 сыл – илиҥҥи халандаарга халлаан күөҕэ өҥнөөх, уу Баабырын сыла. Кытайдар 12 сыллаах эргиир мөһүлгэлэрин кыылларга анаабыттара. Үһүйээн этэринэн, Таҥара сыл бэлиэлэрин түҥэтэригэр аан бастакынан күтэр сүүрэн кэлбит, онтон оҕус, баабыр, куруолук, дракон, моҕой, ат, коза, эбисийээнэ, бөтүүк, ыт сибиинньэ кэлбиттэр.

Дьэ, бу мөһүлгэ кыылларыгар үүнэр сыл тугу тосхойор эбитий? Астролог Елена Егорова билгэтин ааҕыҥ.

Күтэр

Күтэр сылыгар төрөөбүттэри быйыл табыллыы, ситиһии күүтэр. Сайдарга-үүнэргэ, урут кыаллыбатах дьыалалары ситиһэргэ кыах баар буолуо. Дьону кытары тапсан үлэлээтэххитинэ, кинилэр өйөбүллэрэ күүһү-уоҕу биэриэ, кэккэ бырайыактары олоххо киллэриэххит. Улахан баҕа санааны толорорго бастаан сыалгытын-соруккутун чопчулааҥ уонна былааннаммыт хардыылары оҥорон барыҥ. Онон үп-харчы өттүнэн балаһыанньаҕытын тупсарар кыах үөскүө. Тус олоххо сыһыан тупсар – кимиэхэ эрэ дьиэ кэргэҥҥэ эбиллии баар буолуо, оҕо-аймах саҥата чуопчаарыа, ким эрэ тапталын көрсүө.

Оҕус

Дьэ, Оҕус сылыгар төрөөбүттэр олохторугар хамсааһыннар, уларыйыылар саҕаланыахтара. Ким эрэ дьиэтин-уотун саҥардыа, атын сиргэ көһүө, эбэтэр, үлэтин уларытыа. Маннык улахан уларыйыылар буолалларыгар тоҕоостоох кэм кэлбит. Ыал буолааччыларга Баабыр сыла эмиэ үтүө тосхоллоох. Үүнэр сылга Оҕустар хорсун санааны ылынан, өр кэмҥэ толкуйдаабыт идиэйэлэрин олоххо киллэрэн, үп-харчы өттүнэн балаһыанньаларын лаппа тупсарыахтарын сөп. Саҥа бырайыактар кэскиллээх, ситиһиилээх буолуохтара. Бэйэҕэ эрэллээх, үтүөҕэ тардыһыылаах, сырдык ыралаах буоллахха, барыта табыллыа.

Баабыр

Баабыр сылыгар төрөөбүттэргэ 2022 сыл – ыра санаа туолар кэмэ. Онуоха кэтэһэн эрэ олорбокко, баар дьоҕуру туһанан, куттаммакка, саҥа хардыылары оҥорон иһиэххэ наада. Бу сыл – эһиги сылгыт! Онон бэйэ дьыалатын арыйарга, дьону кытары сыһыаны тупсарарга, ыкса сибээс олохтуурга, биллэр-көстөр киһи буоларга тоҕоостоох кэм. Интэриниэт кыаҕын киэҥник туһаныҥ уонна элбэхтик үөрэниҥ, сайдыҥ. Олус элбэх сайдар-үүнэр кыах баар. Быйыл оҥорбуккут барыта табыллан, санаабыккыт сатанан иһиэҕэ. Маннык үтүө кэми мүлчү тутумаҥ!

Куруолук

Быйыл Куруолуктарга умнуллубат, ураты сыл буолуоҕа. Өйү-санааны уларыттахха, бүтүн Дьылҕаны да уларытар кыах үөскүөҕэ. Бастаан барыта сатаммат, табыллыбат, тохтоон хаалбыт курдук буоллаҕына, санааҕытын түһэримэҥ, бу – уларыйыы бэлиэтэ. Сыл саҕаланыыта киһини соһутар сонуннары истиэххит. Онуоха уолуйбакка, ыксаабакка, сөптөөх быһаарыныыны ылыахтааххыт. Соҕотоҕун буолбакка, чугас дьоҥҥутун, доҕотторгутун кытары түмсэн, элбэҕи кыайыаххыт, саҥа таһымҥа тахсыаххыт. Дьиэ кэргэҥҥитигэр сыл түмүгэр дьоллоох түгэн тосхойон, үөрдүө.

Луо Кыыл (Дракон)

Бу сылга олоххутугар улахан уларыйыылар буолуохтара. Онуоха бэлэм буоларга күүһү-уоҕу, эниэргийэни мунньунуоххутун наада. Сынньанары, доруобуйаны көрүнэри, кэмигэр эмтэнэри умнумаҥ. Чэбдигирэр туһуттан хааман, сүүрэн саҕалааҥ. Аскытын-үөлгүтүн көрүнүҥ, туохтан эрэ аккаастанарга күһэллиэххит. Дьиэни, эбэтэр массыынаны атыылаһарга, инвестицияҕа үп-харчы мунньунарга тоҕоостоох кэм. Олоххо уларыйыы буолуон иннинэ, бастаан өй-санаа өттүнэн уларыйыахтааххыт. Быһаарыныыны үчүгэйдик толкуйдаан, ыараҥнатан көрөн баран, ылыныҥ. Оччоҕо барыта табыллыа!

Моҕой

2022 сылга Моҕой сылыгар төрөөбүттэр өй үлэтинэн ситиһиилэниэхтэрин сөп. Научнай үлэни, кинигэни суруйарга, блог арыйарга иэйии, эниэргийэ киириэҕэ. Урут таайыллыбатах информация биллэн кэлиэн сөп. Саҥа идиэйэлэри мүлчү тутумаҥ. Сыл бастакы аҥаарыгар харыгытын ньыппарынан, элбэхтик үлэлиэххитин наада. Оччоҕо ситиһии да кэлиэҕэ. Эһиэхэ бу сыл – бэйэни сайыннарыы уонна доруобуйаны көрүнүү сыла. Онон сайынын дуоһуйа сынньанаргытын умнумаҥ. Күһүөрү айан, кэлии-барыы, түбүк күүтэр. Тус олоххо, дьиэ кэргэҥҥэ болҕомтоҕутун ууруҥ.

Ат

Ат сылыгар төрөөбүттэргэ эрчимнээх дьайыылардаах, сонун идиэйэлэрдээх, саҥа көрүүлэри эрэйэр сыл үүннэ. Уларыйыылартан куттанымаҥ, уу хамсаабат сиригэр ньамаҕынан бүрүллэр. Саҥа сыл саҥа дьыаланы тосхойуо, ол түмүгэ төһө көхтөөхтүк дьаһанаргытыттан тутулуктаах. Чугас дьоҥҥут онно эмиэ кыттыһыахтара. Дуоһунаска үрдээһин, үлэни уларытыы күүтүөн сөп. Саҥа бырайыак ситиһиилээх буолуоҕа. Тус олоххо эмиэ элбэх үчүгэй сонуннар баар буолуохтара. Ат сылыгар төрөөбүттэр быйыл төһө да түргэн уларыйыылартан соһуйдаллар, дьол, олохтон дуоһуйуу диэн тугун билиэхтэрэ.

Коза

Эһиги урукку олоххут биир түһүмэҕэ түмүктэнэн эрэ эбит. Холобур, үөрэҕи бүтэрии, саҥа үлэҕэ киирии, ийэ-аҕа буолар дьолу билии, ыал буолуу, эбэтэр, арахсыы, бэйэ дьыалатын арыйыы, дьылҕа анаабыт киһитин көрсүһүү, ыраах айан, о.д.а. Онон бастаан чуумпуран, олох биэрэр уруоктарын ырытан, анааран көрүҥ. Урукку сыыһаларгытын хатылаамаҥ, хом санааттан ыраастаныҥ. Дьоҥҥо, олоххо, бэйэҕитигэр махталлаах буолуҥ. Саҥаны саҕалыырга, үөрэнэргэ тоҕоостоох кэм. Интэриниэт нөҥүө интэриэһинэй билсиһиилэр баар буолуохтара. Саҥа таһымҥа тахсарга бэлэм буолуҥ.

Эбисийээнэ

Үүнэр сыл бастакы ыйдарыгар чуумпуран, бэйэни кэтэнэн сылдьаргыт ордук буолуо. Оннук гынан дьон куһаҕан дьайыытыгар киирэн биэрэртэн туттунаҕыт. Бу сыл устата тугу эрэ талар, ыйааһын бэскитинии биэрэҥниир түгэннэр баар буолуохтара. Онон үчүгэйдик толкуйдаабакка эрэ, тугу да гынымаҥ. Саҥа сиргэ тиийэн, элбэх саҥа дьоннуун билсии ситиһиини аҕалыа. Бэйэни салайарга, кыбыстыбат, толлубат буоларга үөрэниэххит. Үп-харчы балаһыанньата тупсуоҕа. Ол эрээри, эбии үлэлииргит, икки дьыаланан дьарыктанаргыт эрэйиллэр, онно күүскүт-уоххут тиийиэҕэ. Улахан суолталаах сонуну истиэххит.

Бөтүүк

Баабыр сылыгар сэрэхтээх буолуҥ, хобу-сиби итэҕэйимэҥ, докумуоннары кичэллээхтик бэрэбиэркэлээҥ, албыҥҥа киирэн биэримэҥ. Ордук интэриниэтинэн түөкүннээһинтэн сэрэниҥ. Эрэллээх доҕотторгут түһэн биэриэхтэрэ суоҕа, көмөлөһүөхтэрэ. Урукку саарбах бырагыраамаларгытын, ситэ оҥорботох дьыалаларгытын хаалларыҥ, ыраастаныҥ, саҥа таһымҥа тахсыҥ. Үтүө дьоҥҥо тардыһыҥ, үтүөнү оҥорорго дьулуһуҥ, эниэргийэҕитин мээнэҕэ бараамаҥ, доруобуйаҕытыгар болҕомтону ууруҥ. Үүнэр сылга эрчимнээх, дьулуурдаах буоллаххытына, ситиһиилээх, ону тэҥэ, нус-хас, холку олох күүтэр.

Ыт

Интэриэһинэй, ураты сыл күүтэр. Төһөнөн көхтөөх, элбэх идиэйэлээх буолаҕыт да, соччонон байылыат, дохуоттаах олохтонуоххут. Айаҥҥа сылдьан, ураты турукка киирэн, иэйиини, эниэргийэни ылыаххыт. Онон саҥа бырайыактары саҕалыырга, биисинэһи кэҥэтэргэ, саҥаны арыйарга, үөһэ дабайарга тоҕоостоох кэм. Саамай сүрүнэ, биир сиргэ тэпсэҥниири хаалларыҥ, олоххут муоһатын илиигитигэр ылыҥ, мээнэ кыыһырымаҥ, ыксаамаҥ, долгуйумаҥ. Оччоҕо суолгут арыллан иһиэҕэ, махталлаах килийиэннэр, дьоллоох түгэннэр, үп-харчы баар буолуохтара. Киһи ис туругуттан олус элбэх тутулуктааҕын умнумаҥ.

Сибиинньэ

Баабыр сыла эһиэхэ элбэх ураты, умнуллубат түгэннэринэн баай. Урут мунньуммут билиигитин, үөрүйэххитин, уопуккутун, кыаххытын туһанар кэмҥит кэлбит. Ону тэҥэ, аҕа көлүөнэ дьон сүбэтэ-амата эмиэ туһалаах буолуо. Саҥа дьыаланы саҕалыырга бэрт тоҕоостоох кэм. Дьоҥҥо көмөлөһөр буоллаххытына, соччонон бэйэҕитигэр кыах, күүс эбиллэн, саҕахтар арыллан иһиэхтэрэ. Дьоҕургутун туһанан, үп-харчы балаһыанньатын тупсарыаххыт. Онон үүнэр сылга ситиһии, табыллыы баар буолуо. Чугас дьоҥҥут өйөбүлүн билиэххит, өрөгөйдөөх түгэҥҥэ үөрүүгүтүн тэҥҥэ үллэстиэххит.

Ангелина Васильева, «Саха сирэ» хаһыат, 

Хаартыска: kp.ru

3
0
Telegram @edersaas20