Горнайтан 92 спортсмен Бороҕоҥҥо кыттар

Ааптар: 
Бөлөххө киир:

Горнай улууһуттан кэлбит хамаанда спортсменнара Майаҕаска бииргэ түспүттэр.

Биир дьиэҕэ хоно-өрүү сытан тириэньэрдэр, быраастар уонна биллэн турар, спортсмен уолаттар, кыргыттар биир дьиэ кэргэн кэриэтэ олорон күрэхтэһиилэргэ бэлэмнэнэллэр. Арыаллыы кэлбит Горнай улууһун аатырбыт тустууга, улууска успуорду сайыннарар киин дириэктэрэ Осип Михайлов Бороҕоҥҥо улуус чиэһин көмүскүү 92 спортсмен кэлбитин этэр.
Үһүс бөлөххө (15 тыһыынча иһинэн нэһилиэнньэлээх) кыайыы туһугар киирсиэхпит. Быйыл элбэх көрүҥҥэ ситиһиилээхтик кыттарга эрэллээхпит. Ол курдук, охчут кыыспыт Розалина Тимофеева, боксербут Борис Сидоров, тустууктарбыт Вальтер Владимиров, Эдуард Максимов үчүгэйдик кыттыахтара дии саныыбын. Ыстаҥаҕа Кай Адамов, спортивнай хаамыыга Геннадий Степанов, дуобакка Станислав Контоев, бэстилиэтинэн ытыыга Мария Егорова үчүгэйдэр. Биирдиилээн ааттыаҕы, дьоммут элбэхтэр. Холобур, спортиҥҥа ытыыга кыттар уолаттарбытын “Петровтар хаммандалара” диэн аатыыбыт – онно бары кэриэтэ аймахтыы Петровтар.
Осип Викторович этэринэн, улууска успуорт маассабай көрүҥнэрин сайыннарыыга улахан үлэ бара турар. Былааннара баараҕай – улууска олорор дьон 76% успуордунан күннэтэ дьарыгыралларын ситиһиэхтэрин баҕараллар. Бу хаһан эрэ туолары былааннаһын буолбатах, билигин успуорду олох нуорматынан оҥорууну горнайдар бүгүн лаппа чугаһаппыттар. Ол курдук, олохтоохтортон 50%-тан тахса киһи успуорт ханнык эрэ көрүҥүнэн дьарыгырарын ситиспиттэр. Онно былырыын «Манчаары оонньууларыгар» үлэҕэ киирбит успуорт тутуулара төһүү буолбуттар.

Ох саанан уонна саанан ытыы көрүҥнэригэр сотору кэминэн биһиги диэки улахан сайдыы барарын күүтэбит. Биллэн турар, интэринээттээх сыал ытар успуорт дэгиттэр комплексыгар өрөспүүбүлүкэ бары уһугуттан оҕолор кэлэн үөрэниэхтэрэ. Чугас эргин олохтоох оҕолор эмиэ бу кииҥҥэ дьарыктаныахтара, сайдыахтара турдаҕа”, — диир Осип Михайлов.

Егор Карпов, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0