Горнай улууһугар «КамАЗ» уонна сэттэ киһилээх микрооптуобус харсыһыыларын түмүгэр, оҕо эмсэҕэлээтэ. Бу туһунан СӨ ИДьМ-тын ГИБДД пропагандаҕа отдела иһитиннэрдэ.
Ол курдук, кулун тутар 10 күнүгэр, киэһэ 17.00 чаас саҕана Горнайдааҕы Ис дьыала отделыгар төлөпүөнүнэн иһитиннэрии киирбит. «Бүлүү» федеральнай суолга дьон эчэйиилээх быһылаан тахсыбытын туһунан.
Барыллаан быһаарыынан, «Тойота Хайс» массыынаны ыытан испит 24 саастаах киһи массыынатын инники чааһын хаҥас өттүнэн «КамАЗ» бирисиэбигэр баран түспүт.
Бу сэттэ киһилээх микрооптуобус Үөһээ Бүлүү улууһуттан Дьокуускай куоракка айаннаан испит. Сорох дьону «индрайвер» сыһыарыынан булаттаабыт.
Быһылаан түмүгэр, илиитигэр көтөхтөрөн испит 2 саастаах уолчаан эмсэҕэлээбит — тиистэрин тоһуппут.
«КамАЗ» суоппара быһаарбытынан, кини суол кытыытыгар тохтоон, боллоххо түспүт иномарканы хостоон таһаара турбут, аварийнай бэлиэни туруорбатах. Харсыһыы суол эргииригэр буолбут.
«Тойота Хайс» суоппарыгар оҕону тиэйии быраабылатын кэспитин иһин административнай матырыйаал толоруллубут. Маны таһынан, бу эдэр киһи дьону анал көҥүлэ суох таһа сылдьыбыта биллибит.
Суоппардар иккиэн арыгы испэтэхтэр. Административнай дьыала тэриллибит.
Госавтоиниспиэксийэ халтараан кэм саҕаламмытынан, суолга ураты сэрэхтээх буоларга, быраабылалары тутуһарга ыҥырар.
Биһиги корр., «Саха сирэ» хаһыат, edersaas.ru
Хаартыскалар: СӨ ИДьМ-тын ГИБДД пропагандаҕа отдела.