Бэрдьигэстээххэ элбэх хайысхалаах успуорт комплекса силигэ ситэн, бүгүн үөрүүлээх быһыыга-майгыга астылар. Манна быйыл сайын «Манчаары оонньууларын» күрэхтэһиилэрэ буолуохтара диэн СИА иһитиннэрэр. Икки мэндиэмэннээх дьиэни тутуу былырыын сыл саҥатыгар саҕаламмыта. Уопсайа 2 478 кв.м иэннээх киэҥ-куоҥ уораҕайга бу да иннинэ бэлиэтээн эппиттэрин курдук, волейболлуохтара, мини-футболлуохтара, баскетболлуохтара. Манна 400 киһи киирэн олорон көрөр миэстэлээх. Өссө эрчиллэр саала, тириэньэрдэр уонна быраас хосторо, боксанан эрчиллэр сир, душ, уо.д.а. бааллар. Успуорт саалатыгар симиэнэҕэ 72 киһи киириэн сөп.
Үөрүүлээх тэрээһиҥҥэ СӨ Бырабыыталыстыбатын бэрэссэдээтэлин бастакы солбуйааччы Кирилл Бычков кыттыыны ылла. Кини Горнай өрөспүүбүлүкэҕэ биир саамай спортивнай оройуонунан биллэрин, онон саҥа комплекстан чөмпүйүөннэр такайыллан тахсыахтара диэн эттэ. «Быйыл сайын улууска «Манчаары оонньуулара» ыытыллар. Бу далааһыннаах тэрээһин оройуоҥҥа элбэх саҥаны киллэриэ, элбэх ыалдьыт кэлиэҕэ, сайдыы бөҕө буолуоҕа«, — диэтэ.
«Ил Дархан көҕүлээһининэн өрөспүүбүлүкэҕэ успуорт улахан эбийиэктэрин тутуу салҕанар. Ол курдук Мэҥэ Хаҥалас, Орто Халыма оройуоннарыгар тутуллубуттара. Маны таһынан, эһиил успуорт үс эбийиэгэ Уус Алдаҥҥа былааннанар. Бу тутуулар федеральнай бүддьүөттэн үбүлэнэллэр«, — диэн иһитиннэрдэ СӨ Бырабыыталыстыбатын бэрэссэдээтэлин солбуйааччы Сергей Местников.
Горнай улууһун баһылыга Никита Андреев «Манчаары оонньууларыгар» бэлэмнэнии чэрчитинэн, 1000 миэстэлээх стадион (3000 миэстэҕэ мобильнай тырыбыналаах) уонна сыалы ытарга дэгиттэр комплекс тутуллан киириэхтээхтэрин иһитиннэрдэ.
Элбэх хайысхалаах успуорт комплексын арыйыы үөрүүлээх тэрээһинигэр СӨ Успуорт миниистирэ Иннокентий Григорьев, «Сахаэнерго» ААУо генеральнай дириэктэрэ, норуот дьокутаата Гаврил Алексеев, уо.д.а. кытыннылар.
Мария Васильева (СИА) хаартыскаларга түһэриитэ.