Саҥа сыл маҥнайгы күннэригэр «Новатордар хамсааһыннара» түмсүү лидердэрэ Иван Степанов, Саргылаана Леонтьева, Мичил Неустроев, Вячеслав Егоров десант тэрийэннэр, Намҥа уонна Бэрдьигэстээххэ биир санаалаахтарын кытта көрүстүлэр.
Бу айаны элбэх саҥа идеялаах ыччат тыа сиригэр олорор диэн санаанан салайтаран тэрийдилэр. Новатордар сүрүн сыалларынан-соруктарынан интэриэһинэй санаалаах дьону бэйэлэригэр тардыы буолар. Нам нэһилиэгэр “Олоҥхо дьиэтигэр” оскуола оҕолоро, устудьуоннар, култуура үлэһиттэрэ буолан мустан саҥаны арыйыы, бырайыак толкуйдааһын тула аһаҕас кэпсэтиилэри ыыттылар, санааларын үллэһиннилэр. Мичил Неустроев кэлбит дьону сэргэхситэн, маастар-кылаас көрдөрдө.
Оттон Бэрдьигэстээх ыччата новатордар дэлэгээссийэлэрин 40-ча буолан көрүстэ. Десант кыттыылаахтара бэлиэтииллэринэн, Горнай улууһун баһылыга Никита Андреев уонна кини солбуйааччыта Владимир Спиридонов тас дойдуга үөрэммит буоланнар, сайдыыны кытары тэҥҥэ хаамсан иһэллэр эбит. Ол курдук, Бэрдьигэстээххэ оҕо технопарката үлэлии турарын сөхпүттэр. Манна оҕолору 3D-принтеры баһылыыртан саҕалаан, аныгы туох баар тиэхиньикэҕэ барытыгар уһуйаллар, үөрэтэллэр. Дэлэгээссийэ кыттыылаахтара мустубут дьону кытары көрсөн дискуссиялыыр былаһаакка тэрийдилэр, аһаҕас кэпсэтии ыыттылар. Манна көрүллүбүт боппуруостары, этиилэри новаторство хамсааһынын лидердэрэ сиһилии үөрэтэн, инники үлэлэригэр туһаныах буолан тарҕастылар.
Маннык айан эдэр дьоҥҥо олус туһалаах. Тыа сиригэр, кырдьык, араас талааннаах ыччат элбэх. Тыа талааннаах ыччата, түмсүҥ!
Ыспыраапка:
Новатор — диэн саҥаны айар, саҥа идеяны киллэрэр киһини ааттыыллар.
Станислав ИОВЛЕВ, edersaas.ru