Горнайга Бэрдьигэстээх орто оскуолатын оҕолоро ойууру, тулалыыр эйгэни харыстыырга тиһиктээхтик үлэлэһэллэр. Соторутааҕыта кинилэргэ бу хайысханан үөрүүлээх сэргэх тэрээһин ыытыллыбытын туһунан СӨ Айылҕа харыстабылын министиэристибэтин пресс-сулууспата иһитиннэрдэ.
Ол курдук, “СӨ ойууру харыстыырга үлэлэһэр оскуола үөрэнээччилэрэ” диэн оҕолорго аналлаах экологическай хамсааһын чэрчитигэр үлэлэринэн кыттыһан, кинилэр өрөспүүбүлүкэҕэ 21-с оскуоланан киирбиттэр. Ойууру харыстыыр, араҥаччылыыр хамсааһын эдэр чилиэннэригэр билиэттэр туттарыллыбыттар, ону сэргэ, ойуур хаһаайыстыбатын уонна оскуоланы кытары хардарыта сибээстээх үлэни салгыырга дуогабар түһэрсиллибит. Оскуола араас хабааннаах аахсыйалары, эспэдьииссийэлэри, куонкурустары ыытар былааннааҕын иһитиннэрбит. Маныаха оҕолор чинчийэр үлэлэригэр, бырайыактарга улахан болҕомто ууруллуоҕун бэлиэтээбиттэр.
«Төгүрүк остуолга» ХИФУ научнай бырагыраамалары уонна граннары өйүүр киинин дириэктэрэ В.И.Дмитриева, Горнай улууһун ойуур хаһаайыстыбатын салайааччытын солбуйааччы А.Д.Максимов, ойуур хаһаайыстыбатын үлэһиттэрэ, уо.д.а. санааларын үллэстибиттэр, педагогическай кэлэктиипкэ үлэни хайдах сайыннарыахха сөбүгэр, куонкурустарга кыттарга ыйыы-кэрдии, сүбэ-ама биэрбиттэр.
Министиэристибэ пресс-сулууспата Ил Дархан балаҕан ыйыгар таһаарбыт Саха сирин экологическэй туруктаах буолуутун туһунан уурааҕар олоҕуран, тулалыыр эйгэни харыстааһыҥҥа туһуламмыт сырдатар, өйдөтөр-иитэр үлэлэр нэһилиэнньэни уонна үүнэр көлүөнэни кытары хардарыта сибээстээхтик, тиһиктээхтик ыытыллалларын бэлиэтиир.