Бүгүн, от ыйын 20 күнүгэр, Горнай улууһугар ойуур уотун умуруорууга көмөлөһө АГАТУ этэрээтэ барда.
Уоту утары үлэҕэ бэйэлэрин баҕаларынан көмөлөһөөччүлэр этэрээттэрин АГАТУ ректорын быстах кэмҥэ солбуйааччы Константин Кривошапкин салайар. Этэрээккэ устудьуоннар уонна үрдүк үөрэх кыһатын үлэһиттэрэ — барыта 32 киһи баар диэн тустаах үөрэх тэрилтэтин пресс-сулууспата СИА иһитиннэрэр.
АГАТУ ойуур баһаарын умуруорууга тэриллибит этэрээтэ оройуоннааҕы лесхозка сүбэ-ама (инструктаж) ылар. Ол кэнниттэн, эбии күүскэ наадыйар нэһилиэнньэлээх пууҥҥа ыытыллар.
Үрдүк үөрэх кыһата уоту утары охсуһа барааччылары тырааныспарынан, хас да күннээх аһылыгынан, ГСМ, СИЗ (респиратордарынан, мааскаларынан, анал ачыкыларынан), туттар тэриллэринэн хааччыйбыт.
АГАТУ биригээдэтин кытары медиктэр, дистанционнай-спутниковай уонна радиосибээс баар буолуутунан хонтуруоллуур исписэлиистэр сибээһи туталлар. Бу бары университет үлэһиттэрэ.
«Элбэх киһи араас тэрээһиҥҥэ кыттыыны ылбыта, баһаары умуруорууга үөрүйэхтээхтэр», — диэн бэтэринээринэй мэдиссиинэ факультетыгар үөрэнэр Василий Домотов эттэ.
«Бэйэлэрин көмөлөрүн дьахталлар эмиэ оҥороллор. Кинилэр этэрээккэ астарын-үөллэрин бэлэмниэхтэрэ, ууларын-хаардарын таһыахтара», — диэтэ Федора Лукина.
«Биһиги университеппыт ойуур дьыалатыгар исписэлиистэри, агрономнары, землеустроителлэри бэлэмниир. Итинэн ойуур баһаарын умуруорууну таһынан, өссө сир-уот баһаар кэнниттэн чөлүгэр түһүүтүн наука өттүттэн көрүү үлэтэ ыытыллыа. Биһиги туора туран хаалбаппыт, көмөлөһөрбүт хайаан да наада», — диэн биология наукатын кандидата Константин Кривошапкин санаатын үллэһиннэ.
Иһитиннэрбиттэринэн, ойуур баһаарын умуруорууга баҕа өттүлэринэн көмөлөһөөччүлэр күн ахсын эбиллэллэр. АГАТУ этэрээтэ онно эбии күүс буолар.