Нэһилиэнньэ олоҕор-дьаһаҕар куттал суох буолуутун хааччыйар судаарыстыбаннай кэмитиэт бэрэссэдээтэлин солбуйааччы Иннокентий Андросов Горнай оройуонугар ойуур баһаардарын умуруорууга үлэни салайыа.
Маны сэргэ, Ил Дархан Горнайга ойуур баһаардарын умуруорууга анал автоколоннаны, ол иһигэр уу таһар массыыналары уонна автоцистерналары киллэрэн туран, суһаллык тиэрдэргэ соруйда. Этии Маҕарас сэлиэнньэтин чугаһыгар ойуур баһаарыгар туһуланна.
«Мин Маҕарас эргин сиригэр-уотугар ойуур уотун умуруорууга кэнники күннэргэ үлэ мөлтөөтө диибин. Ити нэһилиэнньэлээх пууҥҥа куттал суоһаабатын кытары сибээстээх. Оттон уот салгыы тарҕанар, ол буруота дьон доруобуйатыгар наһаа буортулаах. Өрө тахсар, маассабайдык тарҕанар уонна Дьокуускай эргин тиийэр«, — диэтэ Николаев.
Ил Дархан Роспотребнадзор Саха сиринээҕи управлениета маннык түгэҥҥэ күн ахсын иһитиннэриини оҥоро олороругар уонна сүбэни-аманы биэрэригэр соруйда. Оттон Доруобуйа харыстабылын министиэристибэтигэр — куорат олохтоохторо буруоттан сылтаан туруктара мөлтөөн ыҥырдахтарына, суһаллык хардаралларыгар соруйда.
Санатан эттэххэ, Саха сиригэр ааспыт хонукка 27 ойуур баһаара бохсуллубут (иэнэ 56 233 тэҥ). Түөрт ойуур баһаара ураты хонтуруолга тутуллар. Бу Мииринэй оройуонугар Сүлдьүкээр, Горнай улууһугар Өрт, Дьиикимдэ, Маҕарас сэлиэнньэлэрэ.
Ойуур баһаарын умуруорууга 2106 киһи уонна 290 тиэхиньикэ үлэлиир. Маны сэргэ, РФ Оборонаҕа министиэристибэтин, ЫБММ авиацията үлэлииллэр. Бе-200 көтөр ааллар Саха сирин арҕаа өттүгэр, эмиэ уустук балаһыанньалаах ойуур баһаардарын умуруорууга үлэлииллэр. Ардаҕы түһэрэргэ көмөлөһөр Ан-26 зондировщик-самолет бүгүн Горнай, Бүлүү, Ньурба оройуоннарыгар үлэлиир.
Андрей Сорокин (СИА) хаартыскаҕа түһэриитэ