Горнайга ойуур баһаардарын умуруорууга 647 киһи, 92 тиэхиньикэ үлэлиир
Горнай улууһугар ойуур баһаардарын умуруорууга 647 киһи, 92 тиэхиньикэ үлэлиир. Нэһилиэнньэлээх пууннарга куттал суоһаабат.
Горнай улууһугар быһыы-майгы билигин хайдаҕын туһунан улуус баһылыга Никита Андреев бүгүн нэһилиэнньэ олоҕор-дьаһаҕар куттал суох буолуутун хааччыйар судаарыстыбаннай кэмитиэт салайааччыта Дмитрий Лепчиковы кытта быһа биэриигэ кэпсээтэ диэн СИА иһитиннэрэр.
Бүгүҥҥү күн туругунан Горнай улууһугар ойуур баһаардарын умуруорууга 647 киһи, ол иһигэр мобилизовацияламмыт дьон, бэйэлэрин баҕа өттүлэринэн көмөлөһөөччүлэр 312 киһи, «Авиалесоохрана» — 202, Якутлесресурс — 44, ойуур хаһаайыстыбатын — 12 уонна ЫБММ — 77 үлэһитэ бааллар. Барыта 92 тиэхиньикэ үлэлиир. Ол иһигэр 16 ДТ уонна 17 «Беларус» тыраахтар үлэлииллэр. Маны таһынан, МЧС баһаарынай чааһын тиэхиньикэтэ көмөлөһөр. Оройуон баһылыга иһитиннэрбитинэн, билигин Одуну нэһилиэгэр быһыы-майгы уустук. Маҕарас сэлиэнньэтин тула икки улахан баһаар бэлиэтэнэр.
«Балачча элбэх киһи уонна тиэхиньикэ ойуур баһаарын умуруорууга үлэлиир. Бэҕэһээ тыал күүһүрэн, нэһилиэнньэлээх пууҥҥа кутталы үөскэтэ сырытта уонна уот үөһээнэн барар буолла диэн дьаарханыы буола сырытта. Өрөспүүбүлүкэ суһал ыстаабын сөптөөх үлэтинэн уонна Маҕарас сэлиэнньэтигэр Ил Дархан тиийэн мунньаҕы ыыппытын түмүгэр, эбии күүс кэлэн, булдьозердар, тыраахтардар, баһаарынай тиэхиньикэлэр, Якутлесресурс, Авиалесоохрана үлэһиттэрэ көмөлөһөллөр. Өрөспүүбүлүкэ Ил Дархана быһыыны-майгыны хонтуруоллуу олорор, күн ахсын ойуур баһаарын умуруоруу үлэтин чопчулаһар«, — диэтэ Никита Андреев.
Одуну нэһилиэгин таһынан, Октябрьскай нэһилиэгэр эмиэ уустук быһыы-майгы бэлиэтэнэр. Билиҥҥи туругунан ойуур уотун утары охсуһууга 94 киһи, 23 көлө үлэлиир. Улуус баһылыга бэлиэтииринэн, баһаары умуруорарга суол-иис уустуга, улахан тиэхиньикэ кыайан тиийбэтэ, минерализованнай балаһалары оҥорорго күчүмэҕэйдэри үөскэппит. Балачча уустук быһыы-майгы Солоҕоҥҥо, Мытаахха, Маалтааныга эмиэ бэлиэтэммитэ.
«Бары миэрэлэр сөптөөх кэмигэр ылыллыбыттара, нэһилиэнньэлээх пууннар хайысхаларынан баһаардар умуруоруллубуттара. Билигин нэһилиэнньэлээх пууннарга куттал суоһаабат. Уот биир сиргэ турбатынан, манна эбии минерализоаннай балаһалары оҥорор, харабыллыыр наада. Манна даҕатан, Ил Дархан көҕүлээһининэн уоту умуруорууга бэйэлэрин баҕа өттүлэринэн көмөлөһөөччүлэртэн, нэһилиэнньэттэн улахан хамсааһын таҕыста диэн бэлиэтиэхпин баҕарабын. Бүгүҥҥү күн туругунан бэйэлэрин баҕаларынан 150 киһи үлэлээтэ, сорохтор биир хонук устатыгар, сорохтор хас да күҥҥэ үлэлии кэлэллэр«, — диэтэ кини.
Билигин улууска 18 ойуур баһаара бэлиэтэнэр, итинтэн 11 уоту умуруорууга үлэ ыытыллар.
+1
+1
+1
+1
+1
+1
+1