Горнай улууһун баһылыга Никита Андреев мэдиссиинэ үлэһиттэрин эҕэрдэлээтэ.
Улуус киин балыыһатын үлэһиттэрэ доруобуйа харыстабылыгар сүдү кылааттарын, коронавирус дьаҥын бохсууга кыһамньылаах үлэлэрин үрдүктүк сыаналаата. Дохсун ытыс тыаһыгар доҕуһуоллатан Ил Түмэн уонна улуус аатыттан Махтал суруктары туттарда.
Кини улууска коронавирус дьаҥар хаптарбыт ыарыһахтарга уонна кэтээн көрүүгэ сылдьар дьоҥҥо мэдиссиинэ көмөтө көдьүүстээхтик тэриллэрин, тиһиктээх үлэ ыытылларын бэлиэтээтэ. Бу уодаһыннаах дьаҥы утары охсуһууга, бохсууга үрүҥ халааттаах аанньаллар дьиэлэриттэн-уоттарыттан, дьонноруттан-сэргэлэриттэн, оҕолоруттан-урууларыттан тэйэн, түүннэри-күнүстэри үлэлэригэр сылдьалларыгар, сыстыганнаах ыарыыны хаптатар туһугар эрдээхтик охсуһалларыгар махтанна.
— Улууспут быраастара тастан көмөтө суох, бэйэлэрин күүстэринэн, билиилэринэн-көрүүлэринэн бу дьаҥы кыайар туһугар кыһамньыларын уураллар. Уопсайа биир инфекционист быраас, биир быраас-лаборант, үс терапевт, үс педиатр быраастар, үс мэдиссиинэ сиэстэрэтэ, үс фельдшер-лаборант, уон «Суһал көмө» үлэһиттэрэ, үс санитарка, икки суоппар улууска хоруона хамсыга тарҕамматын, олохтоохтор сутуллубаттарын туһугар бары болҕомтолорун, кыһамньыларын ууран үлэлииллэр, — диэн эттэ улуус баһылыга.
Салгыы эбии төлөбүр үлэһиттэргэ кэмигэр төлөнөрүн, доруобуйа харыстабылын үлэһиттэрэ идэлэригэр бэриниилээхтэрин, хорсун санаалаахтарын үрдүктүк тутан бэлиэтээтэ, кинилэринэн киэн туттарын, сүгүрүйэрин биллэрдэ.
Ил Түмэн доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга бастайааннай кэмитиэтин Бочуотунай грамоталарын терапевт быраас Ньургуйаана Поповаҕа, терапевт быраас Михаил Соломоновка, «Суһал көмө» отделениетын фельдшеригэр Николай Олесовка, Ил Түмэн дьиэ кэргэн уонна оҕо аймах дьыалаларыгар бастайааннай кэмитиэтин Бочуотунай грамотатын педиатр быраас Александра Никоноваҕа туттарда. «Улуус сайдыытыгар кылаатын иһин» Бочуоттаах бэлиэнэн УЗИ кабинетын мэдсиэстэрэтэ Зоя Алексеева наҕараадаланна. Горнай улууһун баһылыгын Бочуотунай грамотатын инфекционнай отделение ыарыһахтары көрүүгэ алын мэдиссиинискэй сиэстэрэтэ Марфа Шамаева, лаборант быраас Татьяна Юмшанова, Горнай улууһун баһылыгын Махтал суругун инфекционнай отделение медсиэстэрэтэ Мария Петрова, бу отделение ыарыһахтары көрүүгэ алын медсиэстэрэтэ Альбертина Олесова туттулар.
Улуус баһылыга Никита Андреев доруобуйа харыстабылын эйгэтин үлэһиттэригэр, бэтэрээннэригэр идэлэрин эҥкилэ суох баһылаан үрдүк таһаарыылаахтык үлэлээбиттэригэр уонна үлэлииллэригэр махтанна.
Дьон доруобуйата чөл буоларыгар уурар кыһамньылара, билиилэрэ-көрүүлэрэ куруук сыаналанарыгар, үрдүк эппиэттээх үлэлэрэ ситиһиилэнэ турарыгар баҕарда.
Бу күн Бэрдьигэстээх нэһилиэгин баһылыгын солбуйааччы Алексей Аргунов доруобуйа харыстабылын үлэһиттэригэр нэһилиэк дьаһалтатын наҕараадаларын туттарда, махтал тылларын анаата.
Улуус дьаһалтатын пресс-сулууспата.