Күрэхтэһии түһүлгэтигэр өрөспүүбүлүкэ араас муннугуттан 39 хамаанда, 1 850 спортсмен, 314 судьуйа түмсэрэ былааннанар. Уопсайа, 6 560 кэриҥэ ыалдьыт кэлиэхтээх. Кинилэри сэргэ, норуоттар икки ардыларынааҕы научнай-практическай кэмпириэнсийэ кыттылаахтара, суруналыыстар, бэрээдэги араҥаччылыыр уорган, быыһыыр сулууспа, МЧС сотрудниктара, мэдиссиинэ үлэһиттэрэ түһүлгэҕэ түмсүөхтэрэ.
Манчаары оонньууларынан улууска ыытыллар тутуулар ханнык таһымҥа кэлбиттэрин, саҥардыы үлэтин хаамыытын туһунан улуустааҕы успуорт управлениетын начаалынньыга, тэрээһин дириэксийэтин салайар Ариян Александров сырдатта.
ТУРГУН, БЭРГЭН, КЫРСААДА
Бастаан кини “Манчаары оонньууларын” ымыыларын (талисманнарын) сырдатта. Бу ымыылар (талисманнар) ааптардара – Горнайтан төрүттээх худуоһунньук Александр Алексеев.
• Тургун – тайах. Чэпчэки атлетика ымыыта (талисмана). Тайах улуус гербэтигэр баар.
• Кырсаада – сибэкки. Горнай соҕуруу өттүгэр, Маалтааны, Дьиикимдэ, Солоҕон нэһилиэктэрин алаастарыгар үүнэр.
• Бэргэн – бизон. Спортсменнар тулуурдарын-дьулуурдарын кэрэһилиир. Бизоннары тарҕатарга улууска тиһиктээх үлэ ыытыллар.
МАНЧААРЫ ООННЬУУЛАРЫН ТУТУУЛАРА
Успуорт бырааһынньыгар бэлэмнэнии үлэлэр тиһиктээхтик салҕаналлар.
— Саха Олимпиадатынан ааттанар Манчаары оонньуулара үрдүк таһымнаахтык ыытыллалларыгар кыһамньы ууруллар. Ол туһуттан эргиччи үлэ-хамнас ньиргиччи бара турар. Тутууларга улахан болҕомто ууруллар, — диир Ариян Алексеевич.
Элбэх хайысхалаах спортивнай комплекс.
Бэдэрээтчит — “АЭБ Капитал” ХЭУо. Тутуу 91% бэлэм. Былаан быһыытынан, олунньу 16 күнүгэр арыллыахтаах.
Икки мэндиэмэннээх тутуу иэнэ – 2 478 кв.м. 400 киһи олорон көрөр миэстэлээх. Волейболлуур, мини-футболлуур, баскетболлуур, буоксанан дьарыктанар саалалар, судьуйалар, тириэньэрдэр хосторо, быраас кэбиниэтэ бааллар.
Манна остуол оонньууларыгар, хаамыскаҕа, хабылыкка, гиирэни өрө анньыыга күрэхтэһиэхтэрэ.
1 000 миэстэлээх стадион.
Генеральнай бэдэрээтчит — “СК Союз” ХЭУо. Билиҥҥи туругунан, 55% бэлэм. Үлэ бу сааскыттан салҕанар.
Эти-хааны чэбдигирдэргэ, чөл олоҕу көҕүлүүргэ анаммыт стадиоҥҥа 400 миэтэрэ уһуннаах сүүрэр суоллаах оҥоһуллуохтаах.
Манна хапсаҕайга, мас тардыһыытыгар, сүүрүүгэ, национальнай ыстаныыларга күрэхтэһиэхтэрэ. Спартакиада арыллыыта уонна сабыллыыта ыытыллара былааннанар.
Икки мэндиэмэннээх тиир
50 миэстэлээх интэринээттээх буолуохтаах. Генеральнай бэдэрээтчит — “АЭБ Капитал” ХЭУо. Үлэ 20% бэлэм. “Манчаары оонньууларыгар” диэри силигэ ситэриллэн бэлэм буолуохтаах.
Баараҕай тутууга өрөспүүбүлүкэ муннуктарыттан оҕунан ытааччылар кэлэн дьарыктаныахтара.
Манна сыал ытыытыгар уонна ох саанан ытыыга күрэхтэһиэхтэрэ.
Ипподром.
Бэдэрээтчит — “СК Томтор” ХЭУо. Тутуу 70% бэлэм. Манна 24 ат турарыгар көньүүһүнэ, от уурар сир, душ тутуллубута. Мантан саас 1 500 миэстэлээх түрүбүүнэ, судьуйалар турар түрүбүүнэлэрэ өрөмүөннэниэҕэ.
Манна хотугу многоборьеҕа күрэхтэһии буолуоҕа уонна ат сүүрдүүтэ ыытыллыа.
Бэрдьигэстээххэ Семен Данилов аатынан оскуола таһыгар спортивнай былаһаакка тутуллар. 200 киһи олорор миэстэлээх буолуоҕа.
Манна национальнай многоборьеҕа күрэхтэһии ыытыллыа.
Спартакиада хаһаайыттара тэрээһини үрдүк таһымнаахтык ыытар соруктаахтар. «Көмөлөөтөххө, көмүөл мууһа кыайтарар. Оттон сомоҕолостоххо, туруннахха, кыаллыбат диэн суох», — диир Ариян Александров.
Сардаана Баснаева