Горнайга киберспортсменнар күрэхтэстилэр

Бөлөххө киир:

Горнай улууһун Бэрдьигэстээҕэр «Gornay Cyber Cup» диэн Dota 2 оонньууга турнир буолла. Уопсайа 35 кыттааччы сэттэ хамаандаҕа арахсан, сыаналаах бириистэр иһин күрэхтэстилэр. Бу күрэс Muus uSTAR бэстибээлгэ сүүмэрдиир түһүмэх быһыытынан ыытылынна. 

Dota 2 көмпүүтэргэ оонньонор. Биэс оонньооччуттан турар икки хамаанда бэйэ-бэйэлэрин кириэпэстэрин алдьатыахтаахтар диэн сыаллаах. Бу оонньуу киберспортивнай дисциплинаҕа киирсэр, аан дойду үрдүнэн турнирдар ыытыллаллар. Ол иһин даҕаны буолуо, оонньууну сэргээччи күнтэн күн элбиир.

Горнайга күрэһи тэрийбит Николай Корякинныын кэпсэттибит:

— 2012 сыллаахха оскуолаҕа үөрэнэ сылдьан маннык күрэхтэһиини тэрийбитим. Ол кэнниттэн Горнайга ким да маныаха хабааннааҕы ыыппытын истибэтэҕим. Бу ыйга ыччакка аналлаах Muus uSTAR диэн улахан бэстибээл буолаары турарын билэммин, Бэрдьигэстээх нэһилиэгин дьаһалтатыгар тиийэн, сүүмэрдиир турнирда оҥоруохха диэн этии киллэрбитим. Ону дьаһалта, улуус ыччакка салаата уонна М.С.Егоров аатынан сынньалаҥ киинэ өйөөннөр күрэхтэһиини тэрийбиппит. Спонсордары буламмыт бастыҥ оонньооччуларга анал бириистэри туруорбуппут.

Күрэскэ уопсайа 35 киһи мустан сэттэ хамаанда турда. Ким онлайн, ким кэлэн, ыччат ситиһиилээхтик кытынна.

Мин санаабар, киберспорт Саха сиригэр саҥа сайдан эрэр. Улууспар тустаах федерация тэриниэхпин баҕарабын.

Күрэхтэһии түмүгэр бастакы миэстэни «IDG» хамаанда ылла: хамандыыр Мичил Андреев, Владимир Сидоров, Павел Попов, Андриан Антонов, Иван Васильев уонна солбуйааччы Айсен Варламов.

Кыайбыт хамаанда хамандыыра Мичил Андреев сонун тэрээһин туһунан маннык кэпсиир:

— Мин Томскайга бастакы кууруска үөрэнэбин. Күрэс буоларын туһунан Интэриниэт ситимиттэн билбитим уонна кыттарга санаммытым. Dota 2 оонньууну 2017 сыллаахтан оонньуубун. Инникитин да маннык күрэстэргэ кыттар былааннаахпын. Билигин Muus uSTAR бэстибээлгэ кыттаары бэлэмнэнэ сылдьабыт.

Дария Гуляева, ХИФУ суруналыыстыка салаатын 2 куурсун устудьуона.

+1
0
+1
0
+1
0
+1
0
+1
0
+1
0
+1
0