Горнайга үс киһи коронавирустаата. Ону Дьокуускайга университет уопсайыгар дьаҥ туруутун кытта сибээстииллэр.
Горнайга кэнники сууккаҕа үс киһи коронавирус дьаҥыгар хаптарбыт. Манна бастаан ыалдьыбыттар муус устарга биллибиттэрэ. Мытаах нэһилиэгиттэн кэргэнниилэр Санкт Петербург куоракка Вреден аатынан травматология уонна ортопедия НЧИ эмтэнэ тиийэн бараннар, дьаҥнаабыттара биллибитэ. Петербург балыыһатыттан кинилэр тута обсерваторга киллэрбиттэрэ. Онтон манна, Саха сиригэр төттөрү кэлбиттэрэ. Кэргэнниилэр билигин үтүөрэн, Дьокуускайдааҕы сыстыганнаах ыарыыны эмтиир стационартан таҕыстылар. Ыалдьыбыттары кытары хантаактаспыт биэс киһи туттарбыт анаалыһа үчүгэй.
Ыам ыйын саҥатыгар ХИФУ уопсайыгар олорор устудьуон коронавирустаан, ити уопсайга дьаҥҥа элбэх киһи хаптарбыта быһаарыллыбыта. 12 хантаактаах анаалыс туттарбытыттан, үс оҕо анаалыһа дьаҥҥа хаптарбыттарын көрдөрбүт. Кинилэр бүгүн оройуоҥҥа сыстыганнаах ыарыыны эмтиир стационарга сыталлар. Атыттар обсерваторга мэдиссиинэ кэтээн көрүүтүгэр сыталлар уонна бэйэни хааччахтаныы эрэсиимин тутуһаллар.
Кэннники сууккаҕа COVID-19 баара быһаарыллыбыт үс киһи хантаактара эмиэ чуолкайдаммыттар. Ол түмүгэр, 26 киһи бастакы анаалыһын туттарбыт.
Улуус үрдүнэн, Бэрдьигэстээххэ уонна Маҕараска 2 обсерватор баар. Манна мэдиссиинэ үлэһиттэрин кэтэбиллэригэр 30 киһи, ол иһигэр 2 аармыйаттан кэлбит уол бааллар. 33 киһи дьиэҕэ хааччахтанан олоруу эрэсиимин тутуһар. Сыстыганнаах ыарыыны эмтиир балыыһаҕа 6 куойка-миэстэ, 2 тыҥаҕа салгыны биэрэр аппараат баар.