Коронавирус дьаҥын тарҕаппат, бохсор туһуттан, ханна да ирдэбил үрдээтэ. Бу күннэргэ горнайдар дезинфекция үлэтэ нэһилиэктэргэ, тэрилтэлэргэ төһө ыытылларын, ирдэбили тутуһуу хайдаҕын бэрэбиэркэлээтилэр.
Сиһилии улуустааҕы экономическай сайдыы управлениетын кылаабынай исписэлииһэ Мария Максимова иһитиннэрдэ:
—Эргиэн уонна өҥөнү оҥорор тэрилтэлэргэ санитарнай-сэрэтэр дьаһаллары, Роспотребнадзор ирдэбиллэрин толору тутуһалларыгар өйдөтөр-сүбэлиир, иһитиннэрэр үлэлэри ыытыыга улуустааҕы полиция, экономика управлениетын исписэлиистэрэ кыттыылаах биэдэмистибэлэр икки ардыларынааҕы административнай хамыыһыйа тэриллибитэ. Бу хамыыһыйа олохтоммут кыраапыгынан нэһилиэктэринэн сылдьан бэрэбиэркэ оҥордо.
Ол курдук, хамыыһыйа чилиэттэрэ Бэрдьигэстээх, Кировскай, Маҥаны, Атамай, Октябрьскай, Солоҕон, Мытаах нэһилиэктэригэр сылдьан, барыта 45 тэрилтэни хаптылар. Нэһилиэктэргэ элбэх кыбартыыралаах олорор дьиэлэргэ дьаҥы бохсор үлэлэр, дезинфекция хайдах ыытылларын көрдүлэр-иһиттилэр. Бары тэрилтэлэр дезинфекцияны оҥорор сириэстибэлэринэн, бэрчээккэлэринэн, мааскаларынан төһө, хайдах хааччыллыбыттарын чопчулаатылар.
Итини сэргэ, сылдьыбыт тэрилтэлэрин ахсын өйдөтөр-сүбэлиир үлэлэри өссө төгүл оҥорбуттар. Баар итэҕэстэри туоратарга соруйбуттар.
Сүрүн итэҕэстэринэн, маҕаһыыннарга каассаҕа дьаҥтан-дьаһахтан харыстыыр анал бүөлүү туруохтаах хахха суоҕа буолбут. Ону сэргэ, хас да сиргэ дьон-сэргэ бэйэтин икки ардыгар тутуһуохтаах дистанцията ыйыллыбатах, бэлиэ оҥоһуллубатах. Мааската суох сылдьыылар эмиэ бэлиэтэммиттэр. Сорохторго дезинфекцияны оҥоруу сурунаала суох буолан биэрбит. Хамыыһыйа бу итэҕэстэри ыйан туран, туоратыллыыларын хонтуруоллуох буолбут.