Горнайга дьаһалта исписэлиистэрэ уопсастыбанньыктары кытта көрүстүлэр
Бу күннэргэ Горнай улууһунааҕы муниципальнай тэриллии дьаһалтатын социальнай бэлиитикэҕэ отдела «Көхтөөх уопсастыбанньык» диэн улуус уопсастыбаннай түмсүүлэрин салайааччыларын түмэн, аҕыс нэһилиэккэ анал десант тэрийдэ.
edersaas.ru
Улуустааҕы МТ социальнай бэлиитикэҕэ отделын салайааччыта Ксения Васильева иһитиннэрбитинэн, уопсастыбынньыктары кытта атах тэпсэн олорон санаа атастаһыыта, үлэ уопутун билсиһии, туох боппуруоска болҕомтону ууруохха сөбүн туһунан кэпсэтии буолла.
— Уопсайа 300 уопсастыбанньыгы кытта көрүстүбүт. Бэтэрээннэр сэбиэттэрин кытта улуустааҕы Бэтэрээннэр сэбиэттэрин бэрэссэдээтэлэ Дмитрий Ефремов, инбэлииттэри кытта истибэт дьон уопсастыбаларын салайааччыта Ирина Алексеева, дьахталлар сэбиэттэрин бэрэссэдээтэллэрин кытта улуустааҕы Дьахтар сэбиэтин салайааччыта Айталина Баишева, уопсастыбаннай сэбиэттэри кытта Горнай улууһун Уопсастыбаннай сэбиэтин салайааччыта Василий Тимофеев, ыччаттар түмсүүлэрин кытта улуустааҕы муниципалитет дьаһалтатын ыччатыбэлииткэтигэр кылаабынай исписэлииһэ Сардаана Туралысова, аҕалар уонна эр дьон түмсүүлэрин кытта улуустааҕы дьаһалта уопсастыбаннаһы кытта үлэҕэ исписэлииһэ Семен Семенов көрүстүлэр.
Дьоммут-сэргэбит бэрт сэргэхтик олороллор эбит. Сонунтан сонун хайысханы тобулан, араас бырайыагы олоххо киллэрэн эрэллэриттэн киһи үөрэр. Бу сырыыбытыгар Кировскай нэһилиэгин бэтэрээннэрин сэбиэтэ 2021 сылга Горнай улууһугар буолуохтаах 21-с Манчаары оонньууларын пуондатыгар 20 000 солк. уу харчынан киллэрдэ. Ытык кырдьаҕастар улуус олохтоохторугар туһаайан: «Улууспут сайдарын туһугар сомоҕолоһуоҕуҥ. Биһиги холобурбутун батыһыҥ», — диэн ыҥырыы таһаардылар.
Бу маннык «десаннар» улуус социальнай-экэнэмиичэскэй сайдыытыгар дьоммут-сэргэбит үлэтин-хамнаһын, олохтоох былаас уонна уопсастыбаннай түмсүүлэр олоҕу хамсатар бииргэ үлэһээһиннэригэр далаһа ууруунан буолаллар, — диэн бэлиэтиир уопсастыбынньыктар бөлөхтөрүн салайан илдьэ сылдьыбыт улуустааҕы МТ социальнай бэлиитикэҕэ отделын салайааччыта Ксения Васильева.
Сомоҕолоһуу сылыгар улуус дьаһалтатын исписэлиистэрэ уопсастыбынньыктары түмэн, бу маннык дьону көҕүлүүр тэрээһиннэри ыыталлара — атын улуустарга холобур буолуон сөп.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Ксения Васильева түһэриитэ.