Горнай улууһун Бэрдьигэстээх сэлиэнньэтигэр бу дьыл тохсунньу 27 күнүн киэһэтигэр улахан баһаарга оҕо тыына быстыбыта.
Вера МАКАРОВА, «Саха сирэ» хаһыат, https://edersaas.ru/
Силиэстийэ уорганнара бу чахчынан РФ Холуобунай кодексатын 109-с ыст. 1 чааһынан, ол эбэтэр, сэрэҕэ суохтан киһини өлүүгэ тиэрдии бэлиэтэ баарынан, холуобунай дьыала тэрийдилэр.
Силиэстийэ сабаҕалыырынан, ити киэһэ Данилов уулуссатыгар турар биир дьиэ кыбартыыратыгар баһаар буолбут: үс оҕолоох ыал ийэтэ куукунаҕа уот турбутун көрөн, 2016 сыллаах төрүөх уолун уонна 2012 сыллаах төрүөх кыыһын дьиэттэн таһаартаабыт. Оттон 1 саас 10 ыйдаах уолчаана кэннилэриттэн батыһан испит. Дьахтар дьиэттэн тахсан баран, өйдөөн көрбүтэ — уолчаана суох эбит. Оҕотун төннөн киирэн көрдүөҕүн, хойуу буруо мэһэйдээбит.
Ийэ эрэйдээх этин-сиинин 22 %-нын уокка сиэттэрэн, балыыһаҕа киирбит. Дьиэ бүтүннүү уокка былдьаммыт. Оттон дьиэттэн кыайан тахсыбакка хаалбыт кырачаан барахсан өлүгүн тохсунньу 28 күнүгэр, күл-көмөр буолбут дьиэни сүргэйии кэмигэр булбуттар.
Дьыала силиэстийэлэнэр. Баһаарынай-техническэй, судебнай-медицинскэй экспертизалар анаммыттар. Барыллаан сабаҕалааһынынан, баһаар электропроводка уот саҕыллан, онтон саҕаламмыт.
Вера МАКАРОВА, «Саха сирэ» хаһыат, https://edersaas.ru/
Хаартыска: РФ СК Саха сиринээҕи управлениета.