Горнайдар фронтовик учууталларга анаммыт «Махтанабыт буойун учууталларга» диэн бэртээхэй стелаланнылар.
Харахха ыраахтан быраҕыллар ис сүрэхтэн оҥоһуллубут бэртээхэй стела Бэрдьигэстээххэ үөрүүлээх быһыыга-майгыга арылынна. Фронтовик учууталлар үөрэх, билии-көрүү аартыга арылларыгар, сайдарыгар ахсаабат кыһамньыларын уурбуттара. Уот сэриини ортотунан ааспыт, Ийэ дойдуларын хааннаах фашистартан хорсуннук-хоодуоттук көмүскээбит буойун учууталлар биһиги сүрэхпитигэр өрүү тыыннаахтар.
Буойун учууталларга стеланы оҥорор туһунан санааны педагогическай үлэ бэтэрээнэ Василий Игнатьевич Николаев уонна Горнай улууһун үөрэххэ управлениета сахпыттара, көҕүлээбиттэрэ. А.Н.Осипов аатынан Бэрдьигэстээх оскуолатын «Стимул» диэн эдэр учууталлар кулууптарын бырайыага Горнай улууһун баһылыгын Гранын ылбыта.
Стелаҕа 53 фронтовик учуутал аата үйэтитилиннэ. Кинилэр Ийэ дойдуларын көмүскүүр туһугар хорсун быһыылара, киһи быһыытынан бастыҥнара, кэрэлэрэ, билии-көрүү киэҥ далайыгар кэнчээри ыччаты сирдээһиннэрэ дойдулаахтарын үтүмэн көлүөнэ дьонугар үтүө холобур буолар.
Үөрүүлээх тэрээһиҥҥэ Ил Түмэн наукаҕа, үөрэххэ, култуураҕа, сонуну киэҥник тарҕатар ситимнэргэ, уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия Васильевна Габышева, Горнай улууһун баһылыгын солбуйааччы Алгыс Иннокентьевич Стручков, улууска бэтэрээн учууталлар ассоциацияларын бэрэссэдээтэлэ Клавдия Георгиевна Сергеева, уо.д.а. кытыннылар. Фронтовик учуутал Илья Егорович Стручков сиэнэ Айталина Ильинична Филиппова, фронтовик учуутал Петр Михайлович Федоров кыыһа Надежда Петровна Федорова бочуоттаах ыалдьыттарынан буолан долгутуулаах түгэни киэргэттилэр.
Уоттаах сэриигэ кыттыбыт буойун учууталларбыт үтүө ааттарын үйэтитиигэ өйөбүл буолбут, көмөлөспүт бар дьоммутугар Горнай улууһун бары олохтоохторун ааттарыттан махтанабыт.
Улуустааҕы үөрэх управлениета, Горнай.
+1
+1
+1
+1
+1
+1
+1