Бүгүн, кулун тутар 10 күнүгэр, СӨ Үп миниистирин солбуйааччыта Надежда Филиппова Горнай улууһун баһылыга Никита Андреевы уонна нэһилиэктэр баһылыктарын кытта көрүстэ.
Мунньахха улуус уонна нэһилиэктэр үптэрин быйылгы сыллааҕы балаһыанньатын ырыттылар. Ол курдук, туох уларыйыы киирбитин, тыа сирин кэскилин аһаҕастык дьүүллэһэн, салайааччылар санааларын атастастылар, сүбэ-ама ыллылар.
Олохтоох көҕүлээһини өйүүр бырагыраама нэһилиэк социальнай-экэнэмиичэскэй сайдыытыгар олус өйөбүллээҕэ бэлиэтэннэ. Баһылыктар нэһилиэктэргэ көрүллэр дотация харчыта кыратын ыйан туран, инникитин эбии үп көрүллэн, олох тупсарыгар төһүү күүһүнэн буолуо этэ диэн санааларын тиэрдэн туран, Надежда Филиппова анаан кэлэн, тыа сирин салайааччыларын кытта көрсүбүтүгэр махталларын биллэрдилэр.
Баһылыктар СӨ Үп миниистирин солбуйааччыта Надежда Филиппованы кытта көрсүһүүлэрин улуустааҕы «Үлэ күүһэ» хаһыат бэйэтин инстаграмыгар сырдатта.
Елена ПОТОЦКАЯ, “Cаха сирэ” хаһыат, edersaas.ru
Хаартыска — «Үлэ күүһэ» хаһыат инстаграмыттан.