Бу күннэргэ уопуттаах быраас, психотерапевт, гомеопат, иридолог Валентина Кузьмина Горнай улууһун Мытаах уонна Бэстээх сэлиэнньэлэригэр сырытта. Кини арыгылааһынтан босхолонуон уонна дьоҥҥо-сэргэҕэ сөптөөх иһитиннэриини тириэрдиэн баҕалаах дьоҥҥо дьарык ыытта.
edersaas.ru
Мытаах сэлиэнньэтэ арыгыны уонна арыгылаах утахтары атыылааһыны тохтоппут 186 нэһилиэктэн биирдэстэринэн буолар.
Арыгыттан туттунуу аан дойдутааҕы академиятын чилиэнэ Валентина Кузьмина куһаҕан дьаллыктан өйдөрүнэн-санааларынан баҕаран туран босхолонуон баҕалаах дьон араҥатын тэрийиэххэ, онуоха кинилэргэ үөрэх ыытыахха наада диэн бигэ санаалаах.
Кини үс күҥҥэ иккилии чаас устата ыытар кылгас кэмнээх куурустара төрөппүттэргэ, учууталларга, эмчиттэргэ, салайааччыларга уонна обургу оҕолорго ананар. Дьарык кэмигэр кини стреһи устарга эрчиллиилэри оҥоротторор, араас кыһалҕаны быһаарарга сүбэлэри-амалары биэрэр.
“Манна элбэх бириэмэҕин да ыыппаккын, харчы да төлөөбөккүн. Ол оннугар, куһаҕан дьаллыктартан бүтүн дьиэ кэргэн быыһаныа, чөл өйдөөх-санаалаах уопсастыба иитиллэн тахсыа турдаҕа. Биир сэлиэнньэҕэ 20-чэ да киһи үөрэннэҕинэ, атын дьоҥҥо үтүөнэн дьайаллар. Статистика көрдөрөрүнэн, биир үөрэммит киһини тула уонтан тахса чөл олохтоох киһи мустар. Улуустарга, нэһилиэктэргэ элбэх киһи арыгыны иһэрин истэн, билэн, ис сүрэхпиттэн хараастабын. Бу дьиэ кэргэн эрэ кыһалҕата буолбатах, бүтүн саха омугун долгутар кыһалҕа”, — диир уонна бу боппуруос судаарыстыба таһымыгар быһаарыллара наада диэн баҕа санаатын этэр.
Психотерапевт-быраас кэргэнэ Константин Протодьяконовы кытары кэнники 20 сылга өрөспүүбүлүкэ бары кэриэтэ улуустарыгар тиийэн, арыгылааһыны сэрэтиигэ үлэлээн кэллилэр. 40 тыһыынчаттан тахса киһиэхэ лиэксийэлэри уонна бэсиэдэлэри оҥордулар. Икки тыһыынчаттан тахса киһи Шичко ньыматынан куурустарга сырытта.
Надежда ЕГОРОВА, “Саха сирэ” хаһыат, edersaas.ru