Горнай улууһугар ыччат бэлиитикэтин сүрүннүүр исписэлиис, волонтердар ыстааптарын салайар Сардаана Туралысова бэлиэтээбитинэн, улуустарыгар волонтердар үлэлэрэ кулун тутар 23 күнүттэн саҕаламмыт.
Барыта холбоон билигин уопсайа 60 волонтер, сүрүннээн эдэр ыччаттар, бу эппиэттээх үлэҕэ ылсыбыттар. Биллэрин курдук, кинилэр аҕам саастаахтарга, доруобуйаларынан хааччахтаах дьоҥҥо көмөлөһөллөр, астарын-үөллэрин, эмтэрин-томторун, ол-бу наадалаах малы-салы тиэрдэн биэрэллэр уонна дьиэ таһынааҕы үлэҕэ-хамнаска көмөлөһөллөр, хаар күрдьэллэр, муус ылаллар, о.д.а. элбэх.
— Түөрт нэдиэлэни кыайбат кэриҥэ үлэ түмүгүнэн, улуус үрдүнэн уопсайа, 746 сайаапка киирэн, барыта тутатына толоруллан иһэр. Дьон үксүн ас-үөл, күннээҕи туттуллар наадалаах табаар, эмп-томп үлэһэллэр. Элбэхтэ туттуллар мааскаҕа наадыйааччылар эмиэ бааллар.
Түгэнинэн туһанан эттэхпинэ, элбэхтик туттуллар мааскалары тэрилтэлэр кэлэктииптэрэ, уопсастыбанньыктар бэйэлэрин баҕаларынан тигэллэр. Ол түмүгэр, бүгүҥҥү күннээҕинэн барыта 2574 элбэхтэ туһаныллар мааска нэһилиэнньэҕэ тарҕатылынна.
Волонтердар үлэҕэ дьону кытта хантаага суох тиксэрэллэригэр күн ахсын өйдөтүү, сэрэтии ыытыллар. Бу эппиэттээх үлэҕэ сылдар дьоммут доруобуйаларын харыстыыр туһуттан улууспут суһал ыстааба уонна өрөспүүбүлүкэтээҕи волонтердар ыстааптара уопсайа 274 антисептигы, 661 эрэһиинэ бэрчээккэни, 265 биирдэ кэтиллэр маасканы уонна 250 элбэхтик тутуллар маасканы тиэрдибиттэрэ.
Коронавирус дьаҥыттан дьоммутун-сэргэбитин харыстаан, хас нэһилиэк аайы волонтердар этэрээттэрэ тэриллэн кыһамньылаахтык, ис сүрэхтэриттэн бэриниилээхтик үлэлииллэр. Улуус киинигэр, Бэрдьигэстээх нэһилиэгин ыччат бэлиитикэтин, култуураҕа уонна успуорка ааҕыныстыбатын иһинэн үлэни саҕалаабыт «Доброволец» уопсастыбаннай организация күүс-көмө буоларын бэлиэтиибит.
Итиэннэ сайаапка биэриэхтэрин баҕалаах Бэрдьигэстээх олохтоохторугар өссө төгүл тоһоҕолоон, 8 4113 14 13 71 — нэһилиэк дьаһалтатыгар, эбэтэр 8924 568 9774 нүөмэргэ эрийиэххитин сөп диэн иһитиннэрэбит.
Бары бэйэ-бэйэбитин өйөһүөҕүҥ. Түмсүүлээх буолуоҕуҥ. Ыйыллыбыт ирдэбиллэри кытаанахтык тутуһаммыт, бэйэбитин, чугас дьоммутун, улууспут дьонун-сэргэтин харыстыаҕыҥ, — диэн эттэ Сардаана Туралысова.
Хаартыскалар: волонтер ыстаабыттан