“Рослесхоз” салайааччытын солбуйааччы Александр Агафонов ойуур баһаардарын утары охсуһуу ымпыгын-чымпыгын кэпсээтэ.
Ааспыт нэдиэлэ түмүгүнэн 445 тыһыынча гектаар иэннээх сиргэ 201 баһаар умуруоруллубут.
— Суһал ыстаап мунньаҕар Горнай улууһугар үлэлиир бөлөхтөрү элбэтэр туһунан боппуруоһу быһаарбыппыт. Суһаллык “Авиалесоохрана” исписэлиистэрэ, хас да мобильнай биригээдэлэр, эбии тиэхиникэ ыытыллыбыттара. Ол түмүгэр, Горнай улууһугар 6 баһаар умуруорулунна, балаһыанньа хонтуруолланар.
“Өлүөнэ очуостара” хас биирдии киһи сүрэҕэр чугас, ытык сир. Тоҕо онно баһаар буоларый? Барыта 11 баһаар буолбутуттан, билигин сэттэтин умуруордубут, бүгүн-сарсын өссө биири умуруоруохпут. Тоҕо диэтэр, сирэ-буора элбэх тимирдээх. Оттон чаҕылҕан тимирдээх сири булан түһэр. Ону тэҥэ, Сунтаар, Горнай улууһун олохтоохторугар, дьаһалталарыгар улахан махталы тиэрдиэхпин баҕарабын, — диэн Александр Агафонов кэпсээтэ.
Кини этэринэн, баһаарга умайбыт сир иэнин дьон сыыһа өйдүүллэр. Холобур, “бачча гектаар сир умайда” диэн иһитиннэриигэ “бу бачча иэннээх ойуур умайда” диэн өйдүүр сыыһа.
— “100 тыһыынча гектаар умайар” диэни иһиттэхтэринэ, бу бачча сир барыта умайар дии саныыллар. Дьиҥинэн, баһаар ортото умайан бүппүт, кытыытынан эрэ умайар. 2015 сыллаахха биһиги учуонайдарбыт ойуур баһаарын умуруоруу методикатын оҥорбуттара, онно ити кытыытынан төһө сир умайарын ааҕан-суоттаан таһаарыахха сөп. Уот сиэбит сирин иэнэ умайбыт, өлбүт ойуур иэнигэр тэҥ буолбат. Мастар үрдүлэринэн барар уокка ойуур улаханнык эмсэҕэлиир. Онтон, холобур, сааскы баһаарга ойуур 10%-на умайар, тоҕо диэтэр, аллараанан барар, мастары улаханнык таарыйбат. Баһаар умуллубутун кэннэ, сир иэнин чинчийэллэр, ол «верификация» диэн ааттанар. Үксүгэр тыал хайысхатыттан тутулуктанан, уот тыыппатах сирдэрэ эмиэ хаалаллар. Онон ону чинчийии эрэ быһаарар, — диэн кини эттэ.
Ангелина Васильева, “Саха сирэ” хаһыат, edersaas.ru