Горнайга сэрии кэмин оҕолорун олорор услуобуйаларын тупсардылар
2019 сылтан Аҕа дойду Улуу сэриитин кэмигэр күн сирин көрбүт, дьоллоох оҕо саас диэни билбэтэх, сэрии кэнниттэн күүстээх, ыарахан үлэни үлэлээбит бэтэрээн дьоҥҥо анаан Горнай улууhун баһылыга Никита Андреев өйөбүл оҥорор туһунан уураах таһаарбыта.
edersaas.ru
Бу туһунан улуустааҕы дьаһалта социальнай бэлиитэкэҕэ солбуйааччыта Ксения Васильева кэпсиир:
— Улуус дьокутааттарын сэбиэтин быһаарыытынан, нэһилиэктэр баhылыктарын өйөбүллэринэн сэрии кэмин оҕолорун олорор дьиэлэрин усулуобуйатын тупсарыыга баһылык Никита Андреев уурааҕар олоҕуран, 100 тыһ.солк көмө оҥоһуллар.
Быйыл Улуу Кыайыы өрөгөйдөөх 75 сылынан маннык көмөнү 15 сэрии кэмин оҕото туhанна.
Бу күннэргэ кырдьаҕастар дьиэлэрин өрөмүөнүн анал хамыыһыйа көрдө-иhиттэ.
Сэрии оҕото Т.Ф. Аввакумова дьиэтин кырыыhатын уларыппыт, 5 түннүгүн барытын саҥардыбыт.
С.М. Попов дьиэтин акылаатын икки төгүл эргиччи уларыппыт, саҥа муосталаабыт.
Аҕа саастаах дьоммут дьиэлэрин тупсаран, санаалара көтөҕүллэн, махтал тыл бастыҥын эттилэр. Күндү дьоммут этэҥҥэ олороллоругар баҕарабыт.
Елена ПОТОЦКАЯ, «Cаха сирэ» хаһыат, edersaas.ru
Хаартыска — Ксения Васильева тиксэриитэ.