Коронавирус тарҕаныытын бохсор, дьаҥы-дьаһаҕы тохтотор соруктаах, горнайдар өйдөтөр-сүбэлиир, сэрэтэр үлэлэрэ, аҕам саастаахтарга көмөлөрө кэҥээн, оттон ирдэбил, хонтуруол өссө күүһүрэн иһэр.
Бу туһунан улуустааҕы суһал ыстааптан иһитиннэрдилэр. Ол курдук, улуус баһылыга Никита Андреев коронавирус тарҕаныытын бохсор туһуттан, эбии хааччахтааһын миэрэлэрин киллэрбит. Туох баар ылыллыбыт миэрэлэри улууска тэриллибит ыстаап нэһилиэнньэҕэ уталыппакка тиэрдэн, иһитиннэрэн иһэр.
Бастатан туран, Горнай улууһугар бу дьыл кулун тутар 31 күнүттэн муус устар 6 күнүгэр диэри арыгы уонна пиибэ атыылааһына кытаанахтык бобуллубут. Маны нэһилиэнньэ да биһирээбит. Оттон ирдэбил булгуччулаахтык толоруллара хонтуруолланар.
Маны сэргэ, бүгүҥҥүттэн муус устар алтатыгар диэри, харантыын кэмигэр, куораттан уонна атын сиртэн дьону таһар такси сулууспалара үлэлэрин быстах кэмҥэ тохтоппуттар. «Дьаҥ-дьаһах тарҕаныан баҕарбаппыт» диэн санааларын биллэрбиттэр.
Урбаанныттар үлэлэригэр туһулаан, кэккэ өйөбүллэр оҥоһуллубуттар. «Ол курдук, урбаан дьоҕус уонна орто субъектарыгар, физическэй сирэйдэргэ сир арендатын төлөөһүн болдьоҕо балаҕан ыйын 1 күнүгэр диэри уһатылынна. Ону сэргэ, кэмигэр төлөммөтөх арендаҕа пеня ааҕыллыбат. Муниципальнай баайы-дуолу арендаҕа илдьэ сылдьар урбаан субъектарыгар аренда ыйдааҕы төлөбүрэ 0,00 солкуобайга диэри намтатылынна. «Единый налог на вмененный доход» анал нолуок эрэсиимин туһанааччыларга, чуолаан, гостиница, дьону аһатар сирдэр, уонна бытовой өҥөнү оҥорооччулар төлөбүрдэригэр К2 коэффициены чэпчэтэргэ диэн этии улуус дьокутааттарын сэбиэтин көрүүтүгэр боппуруос быһыытынан киллэрилиннэ. Маны сэргэ, дьоҕус уонна орто урбаанынан дьарыктанааччыларга былааннаммыт муниципальнай бэрэбиэркэлэр ыам ыйын 1 күнүгэр диэри тохтоотулар. Оттон нэһилиэктэр баһылыктарыгар сир нолуогар чэпчэтиини олохтуурга этилиннэ», — диэн иһитиннэрдилэр.
Үөрэх хайысхатыгар эмиэ ураты болҕомто ууруллубут. Холобур, улуус баһылыгын дьаһалыгар олоҕуран, дистанционнай эбэтэр тус бырагырааманан үөрэнэр 1830 кыаммат уонна элбэх оҕолоох ыаллар оҕолорун, доруобуйаларынан хааччахтаах оҕолору босхо аһылыгынан (сухой паек наборунан) хааччыйыахтара.
Оттон бүгүҥҥүттэн улуус дьаһалтатын, управлениеларын массыыналара улуустааҕы кииннэммит балыыһаттан аҕам саастаахтары дьиэлэригэр баран көрөллөрүгэр көмөлөһөн сүүрэр буолбуттар.
—Улууспут дьонугар-сэргэтигэр «Улуус иһинэн сырыыгытын хааччахтыыргытыгар, улахан кыһалҕата, наадата суох дьиэттэн тахсыбаккытыгар, ирдэбили тутуһаргытыгар сүбэлиибит. Маннык быһаарыылар бэйэ-бэйэҕитин өйдөһөҥҥүт, тутуспутунан биир санааҕа кэлэргитигэр, дьиэҕитигэр хааччахтанан олороргутугар, бу кэми кытаатан тулуйаргытыгар анаан ылыллаллар. Мантан сирдэтэн, дьиэҕитигэр тулуйан-тэһийэн олоруохтааххыт. Арай, биллэрин курдук, тохтоло суох үлэни эрэйэр олох-дьаһах эйгэтин үлэһиттэрэ эрэ үлэлэригэр сылдьыахтарын сөптөөҕө өйдөнөр.
Эппиэтинэстээх буолуоҕуҥ. Бэйэбитин, чугас дьоммутун харыстыаҕыҥ. Бу дьаҥы түмсүүбүтүнэн, ирдэбиллэри тутуһарбытынан эрэ кыайа тутуохпут» диэтэ баһылык, — диэн иһитиннэрдилэр.
Ыйытыылаахтар 41010 нүөмэргэ эрийэн ыйытыыларгытыгар хоруйдары ылыаххытын сөп диэн биллэрэллэр.
Хаартыскаҕа: Улуус баһылыга Никита Андреев коронавируһу утары үлэҕэ эбии хааччахтааһын миэрэлэрин киллэрэр.
Горнай улууһун дьаһалтатын хаартыската