Бүгүҥҥүттэн, бэс ыйын 25 күнүттэн, Арассыыйа Конституциятыгар уларытыыны киллэриигэ куоластааһын саҕаланна.
Бэлиэ күн улуус төрүттэммит күнүгэр сөп түбэспитэ, горнайдар үөрүүлэрин икки бүк үрдэппит. Бу күн уратытык өрө көтөҕүллүүнү, киэн туттууну саҕар дииллэр улуус дьоно.
Биир бастакынан улуус баһылыга Никита Андреев 176 №-дээх учаастактааҕы быыбардыыр уокурукка куоластаата. Куоластааһын бары кыттыылаахтара, хамыыһыйалар чилиэннэрэ, кэтээн көрөөччүлэр тус харыстанар сириэстибэлэринэн — мааскаларынан, бэрчээккилэринэн, санитайзердарынан хааччыллыбыттар. Оттон куоластыы кэлбит хас биирдии киһини тэйиччиттэн температуратын бэрэбиэркэлииллэр. Дьон бэйэ-бэйэлэрин кытары алтыспаттарын, социальнай дистанцияны тутуһалларын курдук, анаан оҥоһуллубут бэлиэлэр ирдэбили тутуһары өйдөтө-саната тураллар. Оттон тоҕуоруһууну таһаарбат туһуттан, киирии уонна тахсыы барыта тус-туһунан.
Учаастактар бүгүн, бэс ыйын 25 күнүгэр, сарсыарда 10.00 чаастан киэһээ 18.00 чааска диэри үлэлииллэр. Оттон 15.00 чаастааҕы көрдөрүүнэн, улууска уопсайа 350 киһи куоластаата.