Бу күннэргэ 1985 сыллаахха өрөспүүбүлүкэ орто оскуолаларын бүтэрбит выпускниктар уопсастыбаннай түмсүүлэрин улуустардааҕы салаалара «Үтүө санаа харыйата» аһымал аахсыйатын ыыталлар.
edersaas.ru
Выпускниктар Горнайдааҕы салаалара бу аахсыйаҕа эмиэ кытынна. Бу туһунан улуустааҕы дьаһалта социальнай боппуруостарыгар баһылыгы солбуйааччы Ксения ВАСИЛЬЕВА кэпсиир:
— Улууска уопсайа 103 инбэлиит оҕо баар. Кинилэргэ анаан Саҥа дьыллааҕы Харыйа бырааһынньыгын тэрийээри бэлэмнэнэбит. Бэрдьигэстээх, Солоҕон, Атамай, Кировскай нэһилиэктэриттэн уонна Дьокуускай куоракка олорор уопсайа 36 выпускник сүбэлэһэн баран, бэйэлэрин бэлэхтэрин доруобуйаларыгар хааччахтаах оҕолорго анаатылар.
Бэлэхтэр кэлэр сыл тохсунньу 10 күнүгэр кинилэргэ анаммыт Саҥа Дьыллааҕы тэрээhиҥҥэ туттарыллыахтара.
Горнай улууһугар бу аахсыйаны улуустааҕы үөрэх управлениетын кылаабынай исписэлииһэ, улуус Мунньаҕын дьокутаата Аина Егорова сүрүннээтэ.
1985 сыллааҕы выпускниктар уопсайа 36 устуука минньигэс ас бэлэҕин уонна оонньууру хомуйдулар. Эбии 14 бэлэҕи биэриэх буоллулар.
Бу олус наадаалаах хамсааһын өрөспүүбүлүкэ үрдүнэн ыытыллара наһаа үчүгэй! Бэҕээ Уус Алдан таксистарын үтүө санааларын туһунан сырдаппыппыт, аны бүгүн Горнай улууһуттан бэртээхэй сонун кэллэ. Ити курдук, Саҥа дьыллааҕы оҕо анаан күүтэр бырааһынньыгар үтүө дьыаланы оҥорооччулар ахсааннара элбии турдун!
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Ксения Васильева түһэриитэ.