Бу күннэргэ Горнай улууһун “Үлэ күүһэ” хаһыатын эрэдээксийэтин кэлэктиибэ (сүрүн эрэдээктэр Василий Алексеев) “Сэмэн Данилов дневнигэ. 1951-1978 сс.” диэн дьоһун кинигэни бэчээттээн таһаарда.
Биллэрин курдук, норуот поэта 1951 сылтан олоҕун тиһэх сылларыгар диэри дневник сурунара. Барыта уон үс тэтэрээт баара биллэр. Олортон быһа тардыылар “Чолбон” сурунаалга тахсыталаан, ааҕааччы киэҥ сэҥээриитин ылбыттара.
Сэмэн Данилов бэйэтин кэриэһигэр маннык суруйан хаалларбыта баар: “Суруйууларым барылара, ордук “Чахчылар уонна санаалар” туох баалларынан, хайаан даҕаны чөмчөтүллэн тахсыах тустаахтар. Төрөөбүт норуотум кэнники 40-ча сыллаах историятын кыларыйар кырдьыктаах чахчыларын уонна ол чахчылар кыттыылаахтарын тустарынан бэйэм санаабын-онообун, бу кырдьыктааҕа, сөптөөҕө, көнөтө буолаарай диэн суруйарым”.
—Бу “дууһа докумуона” кинигэ быһыытынан тахсыытыгар, биһиги Улуу киһи кэриэһин толорууга, кыратык эмэтик кыттыспыппытынан үөрэ саныыбыт, — диир “Үлэ күүһэ” хаһыат сүрүн эрэдээктэрэ Василий Алексеев. –Бүгүн биһиги уруйдуур-айхаллыыр Поэппыт олус да уустук олоҕу олорбутун дневнигиттэн ааҕан аһына саныаххыт. “Башаринец” аатыран үлэтиттэн үүрүллүбүтэ, олорор дьиэтэ суох хаалбыта, ханна да үлэҕэ ылбаттара, оннук эрэй эҥэрдэспит сылларын туох баарынан күннүгэр сурунара. Мантан суруйааччылар уустук сыһыаннара, ордугурҕаһыы, айар үлэҕэ кынаттаныы, ситиһии, норуот таптала, хайҕала, ССРС биллэр суруйааччыларын кытта көрсүһүүлэрэ, сэҥээрбит улуу бөлүһүөктэрин, суруйааччыларын цитаталааһына, Кулаковскайдааҕы көмүскэһиитэ, тыа дьонугар сыһыана, поэт быһыытынан үүнэн-сайдан тахсыыта – барыта баар.
Литературабыт ааспыт кэмин билбэккэ эрэ, билиҥҥини сыаналыыр, тойоннуур уустук”.
“Сэмэн Данилов дневнигэ. 1951 — 1978 сс.” кинигэни суруйааччы, бэйиэт Николай Винокуров – Урсун хомуйан оҥордо. Бэчээккэ “Үлэ күүһэ” хаһыат сүрүн эрэдээктэрэ Василий Алексеев бэлэмнээтэ. Кинигэ Горнай улууһун дьаһалтатын (улуус баһылыга Н.В. Андреев) үбүлээһининэн биир тыһыынча ахсаанынан Күн сирин көрдө.
“Сэмэн Данилов дневнигэ. 1951 — 1978 сс.” кинигэни “Үлэ күүһэ” хаһыат эрэдээксийэтигэр атыылаһыаххытын сөп.
edersaas.ru