От ыйын 7 күнүгэр Горнай улууһун Октябрьскай нэһилиэгэр уопсайа 5 туочукаҕа ойуур баһаара буола турарынан сибээстээн Саха Өрөспүүбүлүкэтин Ил Дархана Айсен Сергеевич Николаев кэлэн ыксаллаах быһыыны- майгыны сэрэтиигэ, үлэлэһиигэ мунньах ыытта.
Октябрьскай нэһилиэгин олохтооҕо, общественник Мария Яковлева олохтоох хаһыакка санаатын үллэһиннэ:
-Уоту кытары үлэлэһэ сылдьар туочукаҕа миэстэтигэр тиийэн суһаллык дьону кытары көрүстэ, балаһыанньаны билистэ. Кинини кытары тэҥҥэ СӨ бырабыыталыстыбатын бэрэссэдээтэлин бастакы солбуйааччыта Д.Д.Садовников, СӨ айылҕа харыстабылын миниистирэ С.М.Афанасьев, госкомобеспечение бэрэссэдээтэлэ Д.Н.Лепчиков, государственнай сулууспа начаалынньыга Р.З.Босиков, «Якутлесресурс» генеральнай дириэктэрэ Дь.И.Хон, Горнай улууһун баһылыга Н.В.Андреев кэлэн бардылар. Биһиги, Октябрьскай нэһилиэгин олохтоохторо СӨ Бырабыыталыстыбата биһигини өйүүрүттэн, болҕомтоҕо ылбытыттан эрэх турах сананабыт, хаһыат нөҥүө махталбытын биллэрэбит. Бүгүҥҥү туругунан биһиэхэ өйөбүл туохха сытарый? Өрөспүүбүлүкэбит ФГКУ СПСЧ ФПС 29 байыаһы ыытан олорор, группа старшай байыаһа Муравьев Дмитрий Юрьевич уонна үс единица баһаарынай техникалаахтар. Уоту умуруорууга нэһилиэк бары эр дьоно, ыччат уолаттар, чугас сытар нэһилиэктэр көмөҕө сылдьаллар. Ону таһынан, Томскайтан 18 байыастаах авиалесохрана, Горнайдааҕы авиалесоохрана отделениетын байыастара күүс-көмө буолаллар. Тэҥҥэ махталбытын тириэрдэбит биир дойдулаах тумус туттар уолбутугар Ил Түмэн дьокутаатыгар Алексеев Гаврил Николаевичка. Кини бэйэтин баҕатынан 1 тонна ГСМ уонна саамай билиҥҥи кэмҥэ наадалаах тыраахтар саппаас чааһыгар көмө оҥорбутун иһин. Онон биһиэхэ күүс-көмө буолар өрөспүүбүлүкэбит салалтатыгар, улууспут дьаһалтатыгар, бары үлэлэһэр дьоммутугар, байыастары итии аһынан аһатар С.Г.Ковров аатынан оскуола повардарыгар, » Айылгы» оҕо саадын тэрилтэтигэр түгэнинэн туһанан махтанабыт. Көмүөл күүһүнэн ойуурбут уотун уҕарытыаҕыҥ.
Ulusmedia.ru
Подробнее: https://xn—-7sbbprs1bdnl.xn--p1ai/article/16633