Бүгүн, сэтинньи 2 күнүгэр, Росавтодор иһинэн үлэлиир ФКУ «Упрдор Вилюй» Бүлүүлүүр суол 31 км усталаах учаастагын өрөмүөннээн үлэҕэ киллэриитин үөрүүлээх арыллыыта буолла. Тэрээһиҥҥэ федеральнай суол агентствотын салайааччытын солбуйааччы Игорь Астахов, ФКУ «Вилюй» салайааччыта Николай Андреев уонна Горнай улууһун баһылыга Никита Андреев кыттыыны ыллылар. edersaas.ru
Хапытаалынай өрөмүөн түмүгүнэн суол алдьаммыт учаастактара оҥоһулуннулар. Саҥа ньыманан 13 см-даах икки араҥа халыҥнаах 31 км суол асфальтанна. Оҥоһуллубут суол учаастагар саҥа күрүө уонна суол бэлиэлэрин туруордулар.
Тутуу үлэлэрэ түүннэри-күннэри ыытыллыбыттара. Икки балаһалаах суол үлэҕэ киирэн, массыына айана сымныыр уонна айаҥҥа куттала суох буолуоҕа.
Игорь Астахов, федеральнай суол агентствотын салайааччытын солбуйааччы:
— Эрдэ туруоруллубут былаан быһыытынан, 2018 сыл бүтүүтэ Бэрдьигэстээххэ диэри саҥа асфальт суол ууруллуоҕа. Үлэни ыытар хампаанньаларга төлүүр үп көрүллүбүтэ. 2018 сылга диэри Саха Өрөспүүбүлүкэтин бырабыыталыстыбата туруорбут соругунан, Бэрдьигэстээххэ диэри суол 85% оҥоһуллуохтаах. Быйыл биһиги былааны аһара түһэммит, 80% бүтэрдибит. Ол иһин, эһиилги сылга былаантан таһынан үлэ оҥоһуллара күүтүллэр. Үлэ элбэх төрүөттэн тутулуктаах. Саха сиригэр сүрүн кыһалҕаны күн-дьыл туруга оҥорор. Былырыыҥҥы дьыл ардахтаах буолан, үлэ бытаара сылдьыбыта. Оттон быйыл метеостанциялар биһиэхэ үс чаас инниттэн балаһыанньаны этэн сэрэттилэр. Ол иһин, бириэмэни барыстаахтык туттар буоламмыт, үлэ түргэтээтэ.
Николай Попов, «Саха сирэ» хаһыат, edersaas.ru