Горнай уонна Өймөкөөн баһылыктара куйаар ситиминэн ыччат лиидэрдэрин кытта көрүстүлэр
Бүгүн Ыччат министиэристибэтин көҕүлээһининэн «Диалог на равных» диэн бырайыак чэрчитинэн куйаар ситиминэн Горнай уонна Өймөкөөн улууһун баһылыктара өрөспүүбүлүкэ улуустарын лиидэрдэрин кытта көрүстүлэр.
edersaas.ru
Тэрээһини ыытааччы миниистир Степан Саргыдаев бэлиэтээбитинэн, бу маннык куйаар ситиминэн көрсүһүүнү 2018 сылтан ыыталлар эбит.
— Бу тэрээһин федеральнай таһымнаах буолан маннык «Тэҥнээхтиин кэпсэтии» диэн ыччаттары кытта ханнык баҕарар боппуруоска холкутук олорон кэпсэтии дойду 85 эрэгийиэнигэр ыытыллар. Ол иһин Арассыыйа хайа баҕарар муннугуттан ыччат лиидэрдэрин, биллэр култуура үлэһиттэрэ, бэлиитиктэр уо. д.а. араас идэлээх олохторугар ситиһиилээх дьон кыттыыны ылбыттара. Сылга кыбаарталынан үс ыйга биирдэ ыытабыт. Ыччаттар бэркэ сөбүлээн кытталлар. Маннык пуорманан оскуола оҕолорун кытта эмиэ көрсөбүт. Бу сырыыга өрөспүүбүлүкэ улуустарын саамай эдэр баһылыктарын Горнайтан Никита Андреевы уонна Өймөкөөнтөн Иннокентий Сивцевы ыҥыран кэпсэттибит.
Муниципальнай тэриллиигэ баһылыгынан үлэлии сылдьыбыт буолан, миэхэ бу тиэмэ чугас. Онон ыччаттар ыйытыылара да, баһылыктар хоруйдара да астыннарда«, — диэн санаатын үллэстэр миниистир.
Куйаар ситиминэн кэпсэтиигэ өрөспүүбүлүкэтээҕи уопсастыбаннай тэрилтэлэри салайар дьон кыттыбыта бэрт интэриэһинэй буолла. Ол курдук, устудьуоннар идэлээх сойуустарын салайбыт, ыччат миниистирин солбуйааччытынан үлэлээбит Анжелика Андреева баһылыктартан кинилэр салайар улуустарыгар кэммиэрчэскэйэ суох тэрилтэлэр туох үлэни ыыталларын интэриэһиргээтэ.
Ыччаттар улууска дружинниктар үлэлэрин ыйыталастылар, бэрээдэги кэһии балаһыанньатын сурастылар. Онуоха баһылыктар тустаах хоруйдары биэрдилэр.
— 2019 сыллаахха норуот дружинатын бары нэһилиэнньэлээх пууҥҥа тэрийэн баран, бу үлэни сүрүннүүр ыстаап тэрийбиппит. Дружинниктары анал пуорманан хааччыйбыппыт. Ол түмүгэр нэһилиэктэргэ бэрээдэк биллэ тубуста. Улуус киинигэр дружинниктар полиция үлэһиттэрин кытта бииргэ үлэлэһэллэр, — диэн Өймөкөөн улууһун баһылыга Иннокентий Сивцев бэлиэтээтэ.
— Горнайга ДНД икки нэһилиэнньэлээх пууҥҥа тэриллэн үлэлиир. Быйылгыттан дружинниктарга субсидиянан төлөбүр көрүллэр субсидия усулуобуйата уларыйбыта. Онон сорох улуустарга дружинниктары үбүнэн өйүүллэр, — диэн санаатын үллэһиннэ Горнай улууһун баһылыга Никита Андреев.
Улуустарга ыччаттарга үлэ миэстэтэ төһө баарын ыйыталастылар. Ыччаттар төрөөбүт улуустарыгар төһө төннөллөрүн интэриэһиргээтилэр.
«Арыгы атыыламмат чөл нэһилиэктэрэ бааллар дуо, арыгылааһыны кытта туох үлэ барарый?» диэн туоһуластылар.
«Сыстыганнаах дьаҥ эһиэхэ, баһылыктарга, туох өттүгэр болҕомтону уурарга үөрэттэ?» диэн боппуруос эмиэ бэрилиннэ.
Ыччаттар наһаа көхтөөхтөр. Ол да иһин буолуо, балтараа чаас олох биллибэккэ ааста.
Бу маннык тэрээһиннэри ыччаттар сөбүлүүллэрэ харахха быраҕыллар, Бэрт элбэх ыйытыы кэнниттэн, бука, үгүс төлөпүөнүнэн ыйытыы баһылыктарга тус бэйэлэригэр өссө да бэриллиэҕэ. Баҕар, бу кэпсэтии кэнниттэн Өймөкөөҥҥө дуу, Горнайга дуу биир эмэ ыччат үлэлии да барыаҕа.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.