Атырдьах ыйын 17-21 күннэригэр Крым өрөспүүбүлүкэтигэр Судак куоракка бүтүн Арассыыйатааҕы «Таврида — Арт 2023» диэн бэстибээлгэ Горнай улууһун биэс ыччата сылдьан кэллэ. Быйылгы тэрээһин ускуустуба эйгэтигэр сыһыаннаах дьону дойду араас муннуктарыттан түмтэ.
Горнай улууһун ыччата бэстибээл хайдах тэрээһиннээхтик ыытылларын көрдүлэр, уопут ыла сырыттылар. Одуну нэһилиэгин баһылыгын солбуйааччы Василий Кривошапкин, Горнай улууһун дьаһалтатын уопсастыбаны кытары сибээскэ исписэлиис Милона Иванова, ыччат бэлиитикэтигэр, култуураҕа уонна успуорка ааҕыныстыба исписэлииһэ Наталья Никитина, ыччат бэлиитикэтигэр нэһилиэктэртэн исписэлиистэр: Маалтааныттан — Айтал Алексеев уонна Одунуттан — Андриан Брызгалов кыттыыны ыллылар.
Милона Иванова:
— Мин маннык маннык улахан ыччат бэстибээлигэр бастакытыгар сырыттым. Барыта үрдүк таһымҥа барбытын бэлиэтээн этиэм этэ. Олус киэҥ сиргэ, Хара муора кытылыгар, биир нэһилиэк саҕа территорияҕа тэрийбиттэриттэн сөхтүм. Быйылгы тэрээһин дойдуга бэриниилээх буолууга анаммыт. Бэстибээл кыттааччылара эрдэ талбыт хайысхаларынан араас маастар — кылаастарга, кэпсэтиилэргэ, куонкурустарга кыттан, бэйэлэрин айар кыахтарын арыйдылар. Үгүс араас кластердар, тус — туспа айар дьиэлэр, трансфер — барыта кыттааччыларга анаан тэриллибит.
Арассыыйа сулустара — ЛЮБЭ, Олег Газманов, Григорий Лепс, Митя Фомин, Mia Boyka, SHAMAN уонна да атын эстрада ырыаһыттарын күөх экран нөҥүө буолбакка, илэ харахпынан көрүөм диэн санаабат, толкуйдаабат да этим. Ол эрээри, манна кинилэр кэнсиэрдэрин субу туран көрбүтүм — бэстибээл биир кэрэ түгэнэ буолбутуттан олуһун диэн астынабын. Быйыл өрөспүүбүлүкэбитигэр эмиэ сылын ахсын ыытыллар «Муус устар» ыччат бэстибээлигэр кыттыбыт буоламмын, онно майгыннаттым. Маннык курдук тэрээһиннэр ыытыллаллара олус наадалаахтар дии саныыбын. Инникитин Горнайга туризмы, урбаан эйгэтин сайыннарыыга, улуус имиджин үрдэтэргэ сылын ахсын бэстибээл ыытыллара буоллар диэн баҕарабын. Маннык улахан уопуту бэлэхтээбит СӨ Ыччат министиэристибэтигэр уонна улуус дьаһалтатыгар (баһылык Никита Андреев) улахан махталбын тиэрдэбин.
Василий Кривошапкин:
— «Таврида — Арт 2023» бэстибээлгэ сылдьан, киэҥ таһымнаах тэрээһиннэри ыытарга реклама олус наадалааҕын, улахан иэннээх былаһаакканы хайдах тэрийэллэрин, дойду араас муннугуттан олус элбэх волонтердары хайдах хомуйалларын көрдүм-иһиттим, элбэххэ үөрэнним диэтэхпинэ сыыспатым буолуо. Бу бэстибээлгэ кыттыыны ылбытым — төрөөбүт нэһилиэгим, улууһум сайдарыгар, араас таһымнаах тэрээһиннэри ыытарбытыгар, тэрийэрбитигэр улахан көмө буолуо диэн бигэ эрэллээхпин. Биһигини маннык улахан бэстибээлгэ ыыппыт улууспут баһылыгар Никита Викторович Андреевка уонна улууспут дьаһалтатыгар улахан махталбын биллэрэбин.
Горнай улууһун дьаһалтатын пресс — сулууспата