Бу күннэргэ Горнай суолунан сылдьыбыт дьон дьэрэкээн оҥоһуулаах Горнай уонна Дьокуускай кыраныыссатыгар түспүт хаартыскалара интернет ситимин толордо. Аныгылыы оҥоһуллубут «Горнай» уонна «Дьокуускай» диэн суруктаах ураһа киһи хараҕар ыраахтан быраҕылларын дьон бэлиэтээбит. Оттон көбүс-көнө суоллаах массыына тохтуур сиригэр айанньыттар тохтоон, сынньанан, сири аһатан ааһалларыгар табыгастаахтык тутуллубут. Билигин кыраныыссаны саҥардыы үлэтэ түмүктэнэн эрэр.
Никита Андреев, Горнай улууһун баһылыга:
— 2013 сыллаахха Дьокуускай куораты кытта бииргэ үлэлэһии туһунан сөбүлэҥ түһэрсибиппит. Сөбүлэҥ чэрчитинэн, кыраныыссабытан оҥоруохпут диэн сүбэлэспиппит. «Бүлүү» федеральнай суол салалтатын документациятыгар киллэрэн, кыраныыссаны саҥардыыга үп көрүллүбүтэ. Массыына тохтуур сирэ федеральнай бүддьүөт харчытынан тутулунна. Оттон оҥоһуктар бүддьүөт таһынааҕы үбүнэн тутулуннулар. Иллээх-эйэлээх олоҕу бэлиэтиир ураһаны туруордубут. Айанньыттар кыраныыссаҕа сирин аһатан, этэҥҥэ айаннаатыннар диэн өйдөбүллээх. Бырайыагы Горнайтан төрүттээх архитектор, скульптор Афанасий Павлов оҥордо. Тутууга үлэлэспит, көмөлөспүт дьоҥҥо махталбын тиэрдэбин.
Николай Попов, «Саха сирэ» хаһыат, edersaas.ru