Уопсастыба

Горнай улууһун бэтэрээннэрэ үбүлүөйдээх бырааһынньыкка — бочуоттаах ыалдьыттар

Саха АССР төрүттэммитэ 100 сылыгар анаммыт «И они продолжили творение мира…» («Эллэй эһэбит саҕаттан…») театрализованнай көстүү туһунан дьон күн бүгүҥҥэ диэри уоһуттан түһэрбэккэ кэпсээн оҥостор.

Горнай улууһун биир дойдулаахтарын түмсүүтүн салайар Надежда Федорова санаатын бу курдук үллэһиннэ:

— Бэҕэһээ «Триумф» спортивнай киин уораҕайыгар  саха дьонун санаатыттан сүппэт олус да үчүгэй тэрээһин буолан ааста! Биһиги Эллэй саҕанааҕы кэмнэртэн Саха сирэ улуу Арассыыйа судаарыстыбатын кытта 390 сыл бииргэ олорон кэлбиппит олох бу баардыы көһүннэ. Театрализованнай көстүүгэ дойдубут устуоруйата, бүгүҥҥү күнэ бүүс бүтүннүү ойууланна. Элбэх да киһи кыттыыны ылла! Элбэх киһи бу тэрээһини чуумпуран олорон көрдө-иһиттэ. 

Саамай долгутуулаах түгэнинэн Ил Дархаммыт Айсен Николаев үүнэр көлүөнэҕэ кэлэр кэм капсулатын туттарыыта буолла.

Бу биһиги Сахабыт сирин инникилээҕин, сарсыҥҥыга эрэллээҕин туоһутунан буолла.  Режиссердар барыбыт санаатын олус да бэркэ  таптылар диэн сөҕө көрдүбүт. 

Бу тэрээһиҥҥэ биһиги, горнайдар, убаастанар дьоммутун анаан аҕалан сырытыннардыбыт. Кырдьаҕастарбыт олорон ааспыт олохторо дьиҥнээхтик бу баардыы ойууланан көстүбүтүттэн олус долгуйдулар.

Улууспут баһылыга Никита Андреев дьонун-сэргэтин кытта биир эрээккэ  олорон, дойдутун дьонун кытта бу киэһэ арахсыбакка бииргэ сырытта. 

Маннык үөрүүлээх, Сахабыт сирин кыаҕын көрдөрөр тэрээһиннэр элбии турдуннар!

 

Елена ПОТОЦКАЯ, «Саха сирэ» хаһыат.

1
0
Telegram @edersaas20