Бүгүн, муус устар 13 күнүгэр, Горнай улууһун Дьиикимдэ сэлиэнньэтин олохтооҕо коронавируһунан ыалдьыбыта бигэргэннэ.
edersaas.ru
Манан сибээстээн муниципалитет баһылыга Никита Андреев социальнай ситимнэринэн Горнай улууһун олохтоохторугар ыҥырыы таһаарда.
Коронавируһунан ыалдьыбыт эр киһи уонна кэргэнэ Дьокуускай куорат инфекционнай балыыһатыгар киирдилэр. Муус устар 4 күнүгэр кэргэнниилэр Санкт-Петербургтан көтөн кэлбиттэрин кэнниттэн, уоллара бэйэтин массыынатынан Дьиикимдэҕэ аҕалбыт. Кэргэннилэр дьиэлэригэр кэлиэхтэриттэн «самоизоляция» ирдэбилин толору тутуспуттар. Алтыспыт дьоннорун испииһэгэ чуолкайданан, Бэрдьигэстээх обсерваторыгар чугастык алтыспыт биэс киһи киирдэ. Бу дьон анаалыстарын түмүгэ сарсын биллиэҕэ.
Балыыһа эмчиттэрэ харыстанар көстүүмнэринэн уонна мааскаларынан толору хааччыллыбыттар. Икки ИВЛ аппараат, кислороднай концентратор баар.
Дьиикимдэ сэлиэнньэтин олохтоохторо, бэйэни хааччахтанан олорор эрэсиими тутуһаргытыгар ыҥырабыт.
Горнай улууһун олохтоохторо! Улуус иһинэн сырыыгытын хааччахтыыргытыгар, улахан наадата суох дьиэттэн тахсыбаккытыгар этэбит. Бу ирдэбил дьон доруобуйатын туһугар тутуһулларын таба өйдөөҥ. Тохтоло суох үлэни ыытар олох-дьаһах бары салааларын үлэһиттэрэ эрэ үлэлэригэр сылдьыахтарын сөп. ЕДДС нүөмэрэ -4-10-10. Эппиэтинэстээх буолуоҕуҥ! Бэйэ-бэйэбитин харыстаһыаҕыҥ, харыстаныаҕыҥ!
Түмсүүлээх буолуоҕуҥ, олус аймаммакка, бу ыарыыны кыайыаҕыҥ!
Бэчээккэ бэлэмнээтэ
Елена ПОТОЦКАЯ, «Саха сирэ» хаһыат, edersaas.ru
Хаартыска: интэриниэттэн