Семен Олегович Семенов Горнай улууһугар уопсастыбаннай тэрилтэлэри кытары үлэлэһэр исписэлиис үлэтин-хамнаһын туһунан сырдатта:
—Горнай улууһугар уопсайа алта уон кэриҥэ уопсастыбаннай тэрилтэ үлэлиир-хамсыыр. Ону кытары биэс уон алта түөлбэ бу үлэҕэ көхтөөхтүк кыттар. Отут аҕыс кэммиэрчэскэйэ суох тэрилэ эмиэ кыттыыны ылар. Ол иһигэр, аҕыс ТОС кэммиэрчэскэйэ суох тэрилтэ быһыытынан регистрациялаах. Социальнай боппуруостары быһаарарга кинилэр сүҥкэн кылааттарын киллэрэллэр, улахан оруоллаахтар. Ол эбэтэр араас таһымнаах күрэстэргэ, куонкурустарга кытталлар, онон үп ыланнар ураты идеяларын, бырайыактарын олоххо киллэрэллэр.
Хас бырайыак барыта сытыытык турар социальнай боппуруоһу быһаарарга ананар. Холобур быһыытынан ылан көрөр буоллахха, биэс сыл түмүгүнэн кэммиэрчэскэйэ суох тэрилтэлэрбит араас таһымнаах федеральнай, өрөспүүбүлүкэ күрэстэригэр кыттаннар, түөрт уон биэс мөлүйүөн кэриҥэ үп-харчы киллэрдилэр. Оттон биирдиилээн бырайыагы көрөр буоллахха, ортотунан биир бырайыак олоххо киирэригэр уонтан-уон биэскэ диэри доброволец, икки тиэхиньикэ, биэс өйүүр тэрилтэ (партнер) кыттыһаллар.
Хайысхаларынан ылар буоллахха, саамай элбэх бырайыак оҕо эбии сайдарыгар, кырдьаҕастарга болҕомто уурулларыгар уонна доруобуйа харыстабылын өттүгэр, дьиэ кэргэн олоҕо-дьаһаҕа сайдыытыгар туһаайыллар.
Онон мин санаабар, маннык хамсааһын уонна онно өйөбүл баара уопсастыбаннас уонна былаас бииргэ буолан кыһалҕалаах, сытыы боппуруоһу быһаарарыгар итиэннэ уопсай социальнай экэнэмиичэскэй сайдыыга олук уурулларыгар бу төһүү буолар.