Горнай улууһугар дойду Төрүт Сокуонугар уларытыылары киллэриигэ куоластааһын өрө көтөҕүллүүлээхтик салҕанар. Бу туһунан улуустааҕы куоластыыр хамыыһыйа бэрэссэдээтэлэ Михаил Анемподистович Салгынов иһитиннэрдэ.
— Дьон-сэргэ көхтөөхтүк кыттар. Бүгүҥҥү туругунан 30-тан тахса бырыһыан куоластаан олоробут. Сыыппаранан ыллахха, улуус үрдүнэн уопсайа 7374 куоластааччы баарыттан, 2430 киһи кыттыбыт. Дьиэҕэ олорон куоластыырга барыта 500 курдук сайабылыанньа киирбититтэн, 327 киһи куоластаабыт. Бу аҕам саастаахтар, кыра оҕолоохтор уонна дьаҥтан-дьаһахтан дьулайар дьон.
Дьиэҕэ олорон куоластааччыларга учаастактааҕы быыбардыыр хамыыһыйа тиийэр. Маныаха олохтоох дьаһалта массыына биэрэн үлэбитин улаханнык өйөөтө.
Нэһилиэктэргэ дьон-сэргэ кыттыытын көрдөххө, Күөрэлээххэ 50-тан тахса бырыһыан куоластарын биэрэн олороллор. Өрт олохтоохторо 50 %-ҥа чугаһаттылар.
Дьаҥы-дьаһаҕы бохсон, Роспотребнадзор ирдэбилин ханна да кытаанахтык тутуһабыт. Дьон киирээттэрин кытары, тэйиччиттэн кыраадыстара кэмнэниллэр, мааска, бэрчээкки, уруучка бакыакка угуллан хайаан да бэриллэр. Ону сэргэ, бэйэ икки ардыгар тэйиччи сылдьыы тутуһуллар, онуоха анал бэлиэлэр оҥоһуллубуттара. Тоҕуоруһууну таһаарбат инниттэн, киирэр-тахсар ааннар тус-туһунаннар. Маны таһынан, кэмиттэн-кэмигэр санитарнай-ыраастыыр үлэлэр ыытыллаллар.
Сардаана Баснаева, «Саха сирэ» хаһыат
Сүрүн хаартыскаҕа: Октябрьскайга куоластааһын түгэнэ