Сүрүн

Горнай Өртүгэр ыксаллаах быһыы-майгы эрэсиимэ биллэрилиннэ

Бэҕэһээ киэһэ  Горнай улууһун Өрт сэлиэнньэтигэр ыксаллаах быһыы-майгы эрэсиимэ биллэрилиннэ. Манна түөрт дьиэ, биэс тиэргэн, хочуолунай уонна успуорт саалата ууга барда.
Хаар Балаҕан үрэх уутун таһыма туолан, ыксаллаах быһыыны-майгыны үөскэттэ. Билиҥҥи кэмҥэ 25 киһини, ол иһигэр 16 оҕону көһөрдүлэр. Эмсэҕэлээбиттэргэ үбүнэн көмөлөһөр сыаллаах суһал хамыыһыйа тэриллиэҕэ диэн Ил Дархан уонна бырабыыталыстыба дьаһалтатын пресс-сулууспата иһитиннэрэр.
Бэҕэһээ киэһэ 17 чаастааҕы туругунан, Хаар Балаҕан үрэх уутун таһыма 3,24 м этэ, кутталлаах кирбии — 51 см.

Хочуолунайга уу таһыма муостаттан 42 см үрдүк, оттон элбэх кыбартыыралаах дьиэҕэ муостаҕа тиийбит. Итиэннэ Өрт-Дьиикимдэ суолга баар даамбаны эмиэ уу ылла. Нэһилиэккэ уот, сибээс, интэриниэт баар.

Бэҕэһээ ыксаллаах быһыы-майгы эрэсиимэ биллэриллибит нэһилиэгэр бырабыыталыстыба бэрэссэдээтэлин бастакы солбуйааччы Дмитрий Садовников сорудаҕынан Госкомобеспечение бэрэссэдээтэлэ Дмитрий Лепчиков уонна экология миниистирин солбуйааччы Эдуард Пихтин тиийдилэр.

Эһиил 2023 сылга Хаар Балаҕан үрэҕи ыраастыырга, дириҥэтэргэ уонна көннөрөргө субвенция көрүллүөхтээх диэн быһаарылынна.

Солоҕон нэһилиэгин баһылыгар Алексей Захаровка суукканы быһа дьуһуурустуба олохтууругар, уу таһымын кэтээн көрөргө, ууга барбыт социальнай суолталаах эбийиэктэр докумуоннарын чуолкайдыырыгар сорудахтанна.

Горнай улууһун баһылыга Никита Андреев Бэрдьигэстээхтэн Өрткө диэри суол ууга барбыт сирин хонтуруолга ылла.

Бүгүн Өрткө Саха сирин быһыыр сулууспата беспилотнай көтөр аппараатын илдьэ тиийиэҕэ.

0
0
Telegram @edersaas20