Ил Дархан Айсен Николаев бүгүн өрөспүүбүүлүкэ суһал ыстаабын мунньаҕар Горнай, Нам улуустарыгар баар ойуур баһаардара умуруоруллубуттарын туһунан иһитиннэрдэ.
Бүгүҥҥү туругунан, өрөспүүбүлүкэ үрдүнэн барыта 55 сиргэ ойуур баһаара бара турар. 15 сиринэн баһаары умуруорууга барыта 1206 киһи, 106 тиэхиньикэ үлэлии сылдьар. Ааспыт сууккаҕа биэс сиргэ баһаар умуллубута, алта баһаар бары өттүнэн төгүрүтүллүбүтэ. Суһал ыстаап иһитиннэрбитинэн, бэҕэһээ өссө уон сиргэ ойуур баһаара тахсыбыт.
Айсен Николаев улуустарга тэриллибит суһал ыстаапка туһаайан икки күн иһигэр хаалбыт баһаардары умуруорууга күүскэ үлэлэһэргэ эттэ. “Биһиги төһө кыалларынан баһаардары түргэнник умуруора охсон кыстыкка, саҥа үөрэх дьылыгар бэлэмнэниэхпитин наада. Онон хаалбыт баһаардары умуруорууга бары күүһү түмүҥ”, – диэн бэлиэтээн эттэ.
Билигин сүрүн болҕомто Уус Маайа улууһугар баар ойуур баһаардарын умуруорууга туһуланар. Манна 11 сиринэн баһаар бара турар. Ону таһынан Үөһээ Бүлүүгэ, Бүлүүгэ, Кэбээйигэ, Мииринэйгэ, Чурапчыга баһаардары умуруора сылдьаллар. Бэҕэһээ Чуапчы улууһугар баһаары умуруорууга эбии түөрт байыаннай тиэхиньикэни ыыппыттара.
Ил Дархан балаҕан ыйыгар ойуур баһаардарынан улахан мунньах ыытыллыаҕын туһунан иһитиннэрдэ. Кини бэлиэтииринэн, РФ бэрэсидьиэнин уонна бырабыыталыстыбатын көмөлөрүнэн эһиил ойуур хаһаайыстыбатын үбүлээһинэ лаппа үрдүөхтээх. “Ити ойуур хаһаайыстыбатыгар эбии үлэһиттэри ыларга, тиэхиньикэнэн хааччыйарга төһүү буолуоҕа”, – диэн бэлиэтиир кини.
Аграфена КУЗЬМИНА