Бу күннэргэ Горнай улууһун Маҕарас нэһилиэгэр Ил Түмэн иһинэн тэриллибит дьокутаат дьахталлар кулууптарын көһө сылдьар мунньаҕа буолан ааста.
edersaas.ru
Киэҥ ыҥырыылаах көрсүһүүгэ Саха сирин идэлээх сойуустарын федерациятыттан, СӨ дьахталларын уопсастыбаннай тэрилтэлэрин сойууһуттан, Горнай, Ньурба, Үөһээ Бүлүү, Хаҥалас, Нам улуустарын дьокутаат дьахталлара, “Горнай улууһа “МТ дьокутааттарын Сэбиэтин бэрэссэдээтэлэ Алквиад Тарасов уонна Маҕарас нэһилиэгин баһылыга Иван Петров кыттыыны ыллылар.
Мунньахха уопсастыба уонна былаас бэрэстэбиитэллээх уорганнарын бэрэстэбиитэллэрэ биир сомоҕо буолан, өрөспүүбүлүкэбит олоҕун тупсарыыга туһуламмыт сөптөөх тосхолуу тобулууга санааларын атастастылар. Мунньаҕы Ил Түмэн дьахтар дьокутааттарын кулуубун салайааччыта Феодосия Габышева арыйда.
Парламент иһинэн тэриллибит дьокутаат дьахталлар кулууптара 2008 с. ыам ыйыгар IV ыҥырыылаах Ил Түмэн мунньаҕын дьахтар дьокутааттарын уонна СӨ Дьахталлар уопсастыбаннай тэрилтэлэрин сойууһун бэрэссэдээтэлэ Валентина Кириллина көҕүлээһиннэринэн тэриллибит. Кулууп соруга — Ил Түмэҥҥэ ылыллыбыт докумуоннары нэһилиэк, улуус, өрөспүүбүлүкэ таһымыгар олоххо киллэрии. Дьахтар народнай дьокутааттар дойду таһымыгар тахсан, араас суолталаах боппуруостары күүстээхтик туруорсаллар эбит. Соторутааҕыта Чита куоракка буолан ааспыт Уһук Илин дьахталларын форумугар өрөспүүбүлүкэ дьахталларын бэрэстэбиитэллэрэ 2021 сыллааҕы иккис улахан тэрээһини Саха сиригэр ыытарга диэн этии киллэрбиттэр.
«Төгүрүк остуолга» араас сытыы боппуруостары тула кэпсэтии буолла. Манна сүрүннээн ыстааты сарбыйыы курдук сытыы проблема таарылынна. “Саха сирин нэһилиэнньэтин олоҕун хаачыстыбата “ диэн сүрүн дакылааты СӨ Уопсастыбаннай балаататын чилиэнэ, Ил Түмэн II, III, IV ыҥырыылаах мунньаҕын дьокутаата Альбина Поисеева оҥордо.
Онтон бэрэстэбиитэллээх уорганнар дьокутааттарын, уопсастыбанньыктары үөрүүлээх быһыыга-майгыга бэлиэтээтилэр. Социальнай сайдыы эйгэтигэр үтүөлэрин иһин Горнай улууһун Кировскай нэһилиэгин олохтоох модельнай бибилитиэкэтин үлэһитэ Татьяна Иванова, үөрэхтээһин эйгэтигэр тус кылааттарын иһин “Туллукчаана” оҕо сайдар киинин буҕаалтыра, нэһилиэк дьокутаата Римма Никанорова, Хаҥалас улууһун Покровскай 4 №-дээх орто оскуолатын иитэр үлэҕэ дириэктэри солбуйааччы Надежда Козлова Ил Түмэн Бочуотунай кыраамататынан, Горнай улууһун социальнай-экэнэмиичэскэй сайдыытыгар тус кылаатын иһин улуус дьокутааттарын Сэбиэтин Бочуотунай кыраамататынан Маҕарас нэһилиэгин “Туллукчаана “оҕо сайдар киинин иитээччитэ Лейла Артахинова наҕараадаланнылар.
Мунньах кэнниттэн Феодосия Габышева уопсастыбанньыктары приемнаата. Бу күн мунньах кыттыылаахтарыгар анаан “Региональнай уонна муниципальнай бырайыактары олоххо киллэриигэ аныгы сүүрээннэр» диэн сэминээри ВШИМ бырайыактарынан үлэтин сүрүннүүр эксперт Георгий Волков ыытта.
Ити курдук, тыа сирин бэрэстэбиитэллээх уорганнарын дьокутааттара уопуттаах парламентарий дьахталлары кытта санаа атастаһан, сүбэ-ама ылан тарҕастылар.
Мария АНДРЕЕВА,
Горнай улууһа,
Маҕарас нэһилиэгэ.
«Саха сирэ» хаһыат, edersaas.ru
Хаартыскаҕа ааптар түһэриитэ.