Быйыл олунньуга Горнай улууһун нэһилиэктэригэр дьиэ кэргэни өйөөһүҥҥэ куонкурус биллэриллибитэ.
edersaas.ru
Бу күннэргэ күрэс түмүгэ таҕыста. Ыытыллыбыт үлэ туһунан Кировскай нэһилиэгин баһылыгын солбуйааччы Саргылаана Аргунова бу курдук кэпсиир:
— Кировскай нэһилиэгин «Түмэн» уопсастыбаннай түмсүү иһинэн үлэлиир «Дьүөгэ» дьахтар сэбиэтэ «Аҕа пуорума» диэн бырайыагы суруйан кыайыылаах аатын ылан, 30 000 солкуобайдаах граны ылла. Пандемиянан сибээстээн, бырайыагы куйаар ситиминэн олоххо киллэрдилэр.
Ахсынньы 18 күнүгэр «Аҕа уолунаан» күрэх буолан ааста. Бу күрэскэ 5 дьиэ кэргэн кытынна. Манна аҕалар уолаттарын кытта сүүрүүгэ, анньыныыга, баскетбол мээчиги корзинаҕа быраҕыыга, ытыыга, ыстаныыга, викторинаҕа күрэхтэстилэр. 1-кы миэстэни Андрей Оленов уолун Андрейы кытта, 2-с миэстэни Арсен Кубаров уолун Айсены кытта, 3-с миэстэни Владимир Андреев уолун Антону кытта ыллылар. Кыайыылаахтар сыаналаах бириистэри ылан үөрдүлэр-көттүлэр.
Бырайыак чэрчитинэн ZOOM былаһааккаҕа Кировскай нэһилиэгин аҕаларын пуорума буолла. Тэрээһиҥҥэ СӨ Аҕалар лигаларын салайааччыта Айхал Габышев, Горнай улууһун Аҕаларын сүбэлэрин салайааччыта Ариан Александров, Хаҥалас улууһун Нөмүгү нэһилиэгин аҕаларын түмсүүтүн салайааччыта Кузьма Острельдин, Атамай оскуолатын учуутала, тимири уһааран быһах оҥорооччу, «Атамай хоһууттара» уопсастыбаннай түмсүү чилиэнэ Самсон Сидоров уонна Кировскай нэһилиэгин 53 ыалын аҕалара кытыннылар. Ыҥырыылаах ыалдьыттар эр дьону түмүү, оҕону иитиигэ аҕа оруолун, уопсай субуотунньуктарга, тэрээһиннэргэ кыттыы, тимир уһаарыытын, от оттооһунун, аҕаларга анаан спартакиада тэриллиэн сөбүн туһунан нэһилиэк күүстээх аҥардарын кытта санааларын үллэһиннилэр, киэҥ хабааннаах киһини толкуйдатар кэпсэтиини таһаардылар. Пуорум модераторынан Кировскай нэһилиэгин баһылыга Савва Данилов буолла. Тэрээһин кыттыылаахтара Кировскай нэһилиэгин аҕаларын түмсүүтүн салайааччытынан Арсен Кубаровы таллылар.
Пуорум кыттылаахтарыгар анаан бириистэр оонньоннулар. Онон бу киэһэ Кировскай олохтоохторо дьиэҕэ олорон эрэ сэргэх кэпсэтиигэ кытыннылар, кэрэхсэбиллээх бириистэри сүүйдүлэр.
Тэрээһин эр дьон түмсүүлээх буоларыгар төһүү күүһүнэн буолуоҕа. Маннык интэриэһи тардыбыт пуоруму ыытыыга үлэлэспит дьоммутугар, урбаанньыт-спонсордарга Варвара Даниловаҕа, Потап Павловка, сынньалаҥ киинин салайааччыларыгар Октябрина Николаеваҕа, Владислав Павловка, «Дьүөгэ» түмсүү салайааччытыгар Татьяна Кириллинаҕа барҕа махталбытын тиэрдэбит.
Елена ПОТОЦКАЯ, «Саха сирэ» хаһыат, edersaas.ru