Маны аах Уопсастыба

Горнай Кэптинигэр 103 саастаах ытык кырдьаҕас куоластаата

Горнай улууһун Маалтааны нэһилиэгэр бүгүн 103 хаарын санныгар түһэрбит, тыыл, үлэ бэтэрээнэ Власий Кубаров быыбарга бэйэтин куолаһын биэрдэ.

Власий Васильевич балаҕан ыйын 14 күнүгэр 1918 сыллаахха Маалтааны нэһилиэгэр Тоҥуулаах учаастагар төрөөбүтэ. Сэттэ кылаастаах үөрэхтээх. 1983 сыллаахха диэри колхуоска, сопхуоска араас үлэҕэ үлэлээбитэ. 1983 сылтан биэнсийэҕэ тахсан олорор. 1950 сыллаахха Анна Николаевна Тимофеевалыын холбоһон ыал буолбуттара, 13 оҕону төрөтөн атахтарыгар туруорбуттара. Анна Николаевна 2011 сыллаахха олохтон туораабыта.

Власий Васильевич билигин Кэптиҥҥэ олорор. 2018 сыллаахха сүүс сааһын көрсө киниэхэ “Үйэ саас” бэлиэни туттарбыттара. Кини Маалтааны нэһилиэгин, Горнай улууһун бочуоттаах олохтооҕо, Саха сирин бочуоттаах ытык кырдьаҕаһа.

Аграфена КУЗЬМИНА

0
0