Горнай бөдөҥ фермерэ Ньурбаттан, Тааттаттан 180 т оту атыыласта
Өрөспүүбүлүкэҕэ киэҥник биллэр “Сир” бааһынай хаһаайыстыбалаах Аһыма фермерэ Петр Данилов быйыл Ньурба, Таатта улуустарыттан 180 туонна оту атыылаһан, кыһарҕаннаах кыстыгы туоруур кыахтаммыт. Горнай киинтэн төһө даҕаны чугас курдугун иһин, оттуурга-мастыырга табыгаһа суох айылҕалаах, чычырбас оттоох-мастаах улуус.
edersaas.ru
“Сирдэр” быйыл 240-ча ынах сүөһүнү, 60-ча сылгыны кыстатан тураллар. Бу сааскы ыйдарга 120-чэ ынах төрүөхтээҕиттэн улахан аҥаардара төрөөтүлэр. Күн аайы 700-тэн тахса киилэ үүт ыанарыттан ньирэйгэ иһэрдэллэр уонна 400-тэн ордугун туттараллар. “Ньирэйгэ хайаан даҕаны икки ый ийэтин үүтүн иһэрдэн эрэ баран, иһэ-үөһэ бөҕөргүү түспүтүн кэннэ “үүтү солбуйааччыга” көһөрөбүт”, — диир “ферма биригэдьиирэ” дуоһунастаах ыстаарсай ыанньыксыт Александра Алексеева. Александра Иннокентьевна оскуола паартатыттан быһа фермаҕа тахсан, эдэр сааһыгар “Атамай” сопхуос бастыҥ ыанньыксытынан биллибитэ.
Хаһаайыстыба улуус кииниттэн чугас буолан, искусственнай сиэмэлээһини туһанар гынан баран, 2 атыыр оҕуһу тутан “үлэлэтэр”. Петр Петрович этэринэн, сиэмэни ылыммат ынахтарга оҕус ордук. “Сир” бааһынай хаһаайыстыба аныгы технологиянан толору механизациялаах икки хотону утуу-субуу туттарбыта. Балартан субаҥҥа анаан кэлин тутуллубут хотон үкчү Ньурбаҕа сууллубут хотоннор курдук чараас ЛСТК каркастаах эрээри, сиһин ортотунан икки сиринэн тирээбиллээх буолан, тулуктаһан турар быһыылаах.
Түгэнинэн туһанан, хаһаайыстыба салайааччыта Петр Данилов Ньурба бааһынайдара Альберт Герасимовка (Хаҥалас нэһилиэгиттэн), Николай Охлопковка уонна Александр Федоровка (иккиэн Дьаархан нэһилиэгиттэн) холбоон 150 туонна итиэннэ таатталарга 30 туонна отунан салҕаабыттарын иһин барҕа махталын тириэрдэр. “Сир” бааһынай хаһаайыстыба сирэ-уота кырыымчыгын үрдүнэн от аанньа үүммэт буолан, сыл аайы тастан эбии от атыылаһар кыһалҕатыгар кыпчыйтарар. Быйыл онно эбиискэлэһэн, хаһыы мөлтөх буолан, сылгы аһылыкка эрдэ киирбитэ улаханнык оҕуста. Саҥа хотон туттубутугар мөлүйүөнүнэн иэскэ ыйанан сылдьар хаһаайыстыбаҕа ити — ыарахан сүгэһэр.
Василий НИКИФОРОВ, edersaas.ru
Ааптар хаартыскаҕа түһэриилэрэ.