Горнай улууһун Бэс Күөлүн ыччата, эдэр сааһыгар сэрии ыар тыынын этинэн-хаанынан билбит, бойобуой дьайыыларга сылдьыбыт Чечня сэриитин бэтэрээнигэр Николай Сидоровка биир дойдулаахтара олорбут дьиэтигэр өйдөбүнньүк мемориальнай дуоска туруордулар.
«Отвага» уордьан кавалера, 1994-1995 сыллаахха Чечня сэриитин 324 №-дээх Уральскай полк бэтэрээннэрин салайааччыта Вячеслав Павлов, Горнай улууһун локальнай сэрии бэтэрээннэрин салайааччыта Афанасий Ефремов, Атамай нэһилиэгин баһылыгын солбуйааччы Айсен Павлов уонна аймах-билэ дьоно, бииргэ үөрэммит доҕотторо хорсун буойун Николай Сидоров туһунан иһирэх ахтыы оҥордулар.
Аҕа дойдуну көмүскээччилэр күннэрин көрсө байыаннар дьайыылар бэтэрээннэрэ В.Д. Лонгинов аатынан Атамай орто оскуолатыгар ыалдьыттаатылар.
5 -11 кылаас уолаттарын кытта истиҥ-иhирэх көрсүһүү, кэпсэтии буолла.
Түмүккэ үөрэнээччилэр оҥорбут өйдөбүнньүк бэлэхтэрин ыалдьыттарга махтанан туран туттардылар.
Чечня сэриитин бойобуой дьайыыларыгар сылдьыбыт саллаат төрөөбүт, улааппыт дьиэтигэр мемориальнай дуоска туруоруута — бу Николай Сидоров Орто дойдуга олорон ааспытын ытык бэлиэтэ.
Атамай нэһилиэгин ыччата олорбут, турууласпыт олоҕо суола-ииһэ суох хаалбатаҕын туоһулаан, биир дойдулаахтара чуумпуран туран чиэстээтилэр.
«Бу мемориальнай дуоска ыччаты иитиигэ үтүө холобур, нэһилиэк, улуус биир бэлиэ миэстэтинэн буолуоҕа«, — диэн үтүө өйдөбүлү үйэлэргэ хаалларар тэрээһин кыттыылаахтара хорсун буойун чугас дьонугар, үөлээннээхтэригэр махтал тылларын анаатылар.
Елена ПОТОЦКАЯ, “Саха сирэ” хаһыат, edersaas.ru
Хаартыска — «Атамай нэьилиэгэ » муниципальнай тэриллии пресс сулууспата.