Горнай улууһун Атамай нэһилиэгэр «Ала ууһун ыччаттара» диэн дьыалабыай оонньуу буолан ааста. Бу оонньуу Атамай нэһилиэгэ төрүттэммитэ 125 сылыгар уонна СӨ биллэриллибит Ыччат сылыгар ананан ыытылынна. Өрөспүүбүлүкэ таһымнаах күрэхтэһиигэ Горнай, Нам, Кэбээйи улуустара холбоһуктаах, былыргыны, төрдү-ууһу үөрэтии үлэлэрин ыытыллан, биир уустан төрүттээх ыччаты түмүүгэ сыал-сорук турда. Манна СӨ ыччат уонна дьиэ кэргэн бэлиитикэтин министиэристибэтиттэн, салайыы уонна прогнозтааһын отделын салайааччыта Василий Данилов, Горнай улууһун баһылыгын солбуйааччы Владимир Спиридонов, улуус дьаһалтатын социальнай бэлиитикэтин отделын салайааччыта Ксения Васильева, Горнай улууһун ыччат политикатын специалиһа Николаев Николай Анатольевич, Атамай нэһилиэгин баһылыга Роман Федоров, Атамай нэһилиэгин Сэбиэскэй сойуус дьоруойа В.Д.Лонгинов аатынан орто оскуола дириэктэрэ Мотрена Ефремова, оскуола библиотекатын салайааччыта Алла Павлова, Атамай нэһилиэгин «Атамай хоһууннара» эр дьон түмсүүтүн салайааччыта Дмитрий Яковлев экспертнай хамыһыйаҕа үлэлээтилэр.
Тэрээһин үөрүүлээх арыллыыта Василий Данилов тыл этиитинэн саҕаланна. Мустубут дьону Ыччат сылынан эҕэрдэлээн, бүгүҥҥү тэрээһин туһаҕа тахсарын, ситиһиилээх буоларыгар баҕарда. Ыччат сыратын сыаналаан, үтүө суобастаах, кыһамньылаах үлэтин иһин Атамай нэһилиэгин ыччат бэлиитикэтин исписэлииһэ, «АНЫК» ыччат түмсүүтүн салайааччыта Татьяна Алексееваҕа СӨ ыччат уонна дьиэ кэргэн бэлиитикэтин миниистирэ Афанасий Владимиров аатыттан бочуоттаах грамотаны үөрүүлээх быһыыга-майгыга туттарда. Атамай орто оскуолатын учууталыгар, «Чыпчаал» оҕо түмсүүтүн салайааччытыгар Татьяна Павловаҕа үүнэр көлүөнэни, оскуола саастаах оҕолору иитиигэ, уопсастыбаннай хамсааһыҥҥа уһуйууга махтал сурук туттарда.
Тэрээһин иккис чааһыгар мустубут сэрэбиэй түмүгүнэн хамаандаларынан араҕастылар. Горнай улууһун дьаһалтатын социальнай бэлиитикэҕэ отделын начальнига, Атамай нэһилиэгин «СИТИМ» коммерческайа суох түмсүүтүн учредителэ, оонньуу эксперэ Ксения Васильева бырайыагы хайдах сөптөөхтүк суруйарга, сайаапканы толорорго тренинг-семинар ыытта, «СИТИМ» түмсүү үлэтин, ситиһиитин туһунан билиһиннэрдэ. Араас улуустан, нэһилиэктэн мустубут ыччакка доҕордуу сыһыан олохтуурга, бэйэ-бэйэни кытары билсиһиигэ, Горнайдааҕы психологическай киин психологтара трениннары, оонньуулары ыытан, кыттааччылар үөрэн-көтөн, бырайыактарын суруйа тарҕастылар. Дьыалабыай оонньууга уопсайа сэттэлии киһилээх, өҥнөрүнэн арахсар, 7 хамаанда күн устата «Ала ууһун ыччаттарын түмүү» диэн биир тиэмэҕэ бырайыак суруйдулар. Хамаанда хапытааннарынан Атамай нэһилиэгин ыччаттара ананан үлэлээтилэр.
Тэрээһин үһүс чааһыгар ыччат сынньалаҥ киинигэр мустан, суруйбут бырайыактарын көмүскүүр долгутуулаах чаастара үүннэ. Бары өйдөрүн-санааларын түмэн, күн устата суруйбут бырайыактарын экспертнэй хамыыһыйа, дьон-сэргэ иннигэр көмүскээтилэр, араас ыйытыктарга хоруйдаатылар. Хас биирдии хамаанда бырайыага олус интэриэhинэй, ураты көрүүлээх, инновациялаах буолла.
«Ала ууһун ыччаттара» дьыалабыай оонньуу түмүгүнэн I миэстэ – «Үс уус» (капитан Сидорова Дария Михайловна), II миэстэ – «Ала ууһун сирдэринэн айан» (капитан Павлов Айсен Егорович), III миэстэ – «Agricultural Skills» (капитан Павлов Анатолий Николаевич). Муус устар 6-9 күннэригэр Хаҥалас улууһугар ыытыллар «МИНИСТР» дьыалабыай оонньууга путевка Атамай нэһилиэгин биир кэскиллээх ыччатыгар, математика уонна информатика учууталыгар Айсен Павлов үөрүүлээх быһыыга-майгыга туттарылынна.
Үтүө үгэскэ кубулуйбут дьыалбыай оонньуу Атамай нэһилиэгэр ыытыллыбыта номнуо аҕыс сыл буолла. Бастакы сылларга нэһилиэк иһинэн ыытыллар эбит буоллаҕына, кэнники Горнай уонна Кэбээйи чугас сытар нэһилиэктэриттэн кэлэллэр. Быйыл нэһилиэкпит үбүлүөйдээх сылыгар уонна Ыччат сылыгар анаан «Ала ууһун ыччаттара» диэн биир уустан төрүттээх ала ууһун сыдьааннарын нэһилиэктэрин ыччаттарын икки ардыларыгар ыытыллан, оонньуу өрөспүүбүлүкэ таһымыгар тахсыбытыттан киэн туттабыт.
Күрэхтэһии үрдүк таһымҥа ыытылынна диэн бэлиэтээн тураммыт, иилээн-салайан ыытыспыт, спонсордаабыт, күүс-көмө, өйөбүл буолбут Ыччат министиэристибэтигэр, Горнай улууһун дьаһалтатыгар, Атамай нэһилиэгин дьаһалтатыгар, Атамай сынньалаҥ киинигэр, Атамай орто оскуолатыгар уонна биирдиилээн үлэлэспит, сүүрбүт-көппүт дьоммутугар, ыччаттарбытыгар, күрэх кыттыылаахтарыгар, кыттыыны ылбыт ала ууһун нэһилиэктэрин баһылыктарыгар улахан махталбытын тириэрдэбит.
«АНЫК» Атамай нэһилиэгин ыччатын кулууба.