Алдаҥҥа Горнайтан сылдьар 37 саастаах эр киһи тыатааҕыны быһаҕынан өлөрбүтүн туһунан сурах тарҕанна. Ол эрээри, бу сурахха тыатааҕыны быһаҕынан бултаабытын туһунан сурах сымыйатын Иван Кириллин маннык кэпсээтэ.
Горнай улууһун Мытааҕыттан төрүттээх, Бэрдьигэстээх олохтооҕо, ыраах айан суоппара Иван Кириллин Алдаҥҥа аймахтарыгар табаһыттарга ыстаадаҕа дьаарбайа тиийбит. Кини сугуннуу сырыттаҕына тыатааҕы саба түспүт.
Бу туһунан Иван Кириллин маннык кэпсиир:
— Аймахтарбар дьаарбайа тиийэн баран оҕолорбор кэһии гынаары сугуннуу тахсыбытым. Алдаҥҥа тыатааҕы элбэх буолан, олохтоохтор саалаах сылдьан табаларын маныыллар.
Мин бу сугуннуу сылдьан үһүс хараҕым аһыллан, куттал суоһаабытын сэрэйбитим. Бастаан тыатааҕыны көрөн баран куоппутум. Маһынан көмүскэнэ, үүрэ сатаабытым. Ол эрээри, тыатааҕы саба түһэрдии, миигин сиирдии оҥостубут эбит. Кыылым тииһинэн хадьырыйа сатыырын хабарҕатыттан илиибинэн анньан нэһиилэ тохтоппутум. Наһаа күүстээх, кытаанах этэ.
Аны туран хаһан эрэ истибиппинэн, адьырҕа кыыл саба түстэҕинэ суон маска сигэнэн көмүскэннэххинэ, кыыл кэннигиттэн түһэриттэн харыстанаҕын диэни санаа көтөн түһэн, маска сигэнэ сатыыбын. Кыылым түһэ турар. Үөгүлээн дьоммун ыҥыра сатыыбын, сутурукпунан охсобун.
Онтон эмискэ саа тыаһаабытыгар кыылым налыс гыммыта. Күтүөтүм кэлэн турара. Кини саанан ыппыт этэ. «Куттаныҥ дуо?» диэн ыйытар. Кини кэлбэтэҕэ буоллар, иэдээн тахсыа эбит. Улахан эчэйии суох. Илии бүлгүрүйэрэ ханна барыай.
Бэлиэтээн эттэххэ, тыатааҕы нэһилиэктэргэ киириитэ элбээтэ. Бу соторутааҕыта Алдаҥҥа баһылык олбуоругар тыатааҕы киирбитин туһунан суруйбуттара.
Ульяна Захарова, edersaas.ru