Горнай улууһун баһылыга Никита Андреев: «Амматааҕы оонньуу — түмсүү биир көрүҥэ»

Пляж волейболугар кыргыттар оонньууларыгар Горнай кыргыттара сунтаардары кыайдылар. Үөрбүтэ-көппүт, кыайыынан өрө көтөҕүллүбүт бөлөххө тиийэн, Горнай улууһун баһылыга Никита Викторович Андреевы көрсөн, санаатын үллэстэригэр көрдөстүм.

— Пляж волейболугар оонньооччуларбыт үөртүлэр. Эр дьоммут, Игорь Чемезов уонна Федя Данилов күрэхтэһиини кыайыынан саҕалаатылар. Кыргыттарбыт Айта Дагданча уонна Туйаара Никифорова эмиэ үөртүлэр. Бу оонньууларга Горнайтан барыта 74 спортсмен кыттар. Ордук оҕунан уонна буулдьанан ытыыга, боксаҕа, тустууга эрэллээхпит. Тэрээһин үчүгэй. Суол-иис үлэтигэр баһаам үлэ барбыт. Спорка анаммыт тутуулар бары бэлэм буолбуттар. Амма тупсубут. Олохтоохтор барытын кичэйэн оҥорбуттара, үөрэ-көтө көрсүбүттэрэ, уопсайынан, дьон барыта өрө көтөҕүллүбүтэ киһини астыннарар. Саха өйдөбүлэ сайдан иһэрэ көстөр. Оонньуу, бу аҥаардас күрэхтэһии эрэ буолбатах, бу, биһиги түмсүүбүт биир көрүҥэ.

Петр Павлов.