Култуура Маны аах

«Голоса земли» платформаҕа сахалыы киинэлэри көрүҥ

«Голоса земли» онлайн-платформаҕа «Прорыв» диэн сахалыы киинэлэринэн бырагырааманы саҕалаатылар. Бырайыагы AyarKut диэн Саха сирин аныгы искусствотын өйүүр пуонда хамаандата толкуйдаата уонна олоххо киллэрдэ. Бу онлайн-платформаҕа аныгы искусство айымньыларын түмүөхтэрэ, араас тэрээһиннэр ыытыллыахтара.

Олунньу 28 күнүгэр диэри тэрийээччилэр сэттэ сахалыы киинэни көрөргө ыҥыраллар:

  • «Күрүөйэх» (2014, режиссер Степан Бурнашев);
  • «Дьөһөгөй Айыы» (2015, режиссер Сергей Потапов);
  • «Таайымаҥ тапталы» (2015, режиссер Михаил Лукачевский);
  • «Муммуттар» (2015, режиссер Алексей Амбросьев);
  • «Мой убийца» (2016, режиссер Костас Марсаан);
  • «Его дочь» (2016, режиссер Татьяна Эверстова);
  • «Костер на ветру» (2016, режиссер Дмитрий Давыдов).

Бу киинэлэри бэлиэтэммит сыылканан олунньу 28 күнүгэр диэри көрүөххүтүн сөп.

Бүгүн, олунньу 22 күнүгэр, 18:00 чаастан «Прорыв» куратора, NETPAC норуоттар икки ардыларынааҕы тэриллиилэрин уонна кинематографистар сойуустарын чилиэнэ, «Сеанс», «Искусство кино» сурунааллар ааптардара, этническэй киинэ исписэлииһэ Сергей Анашкин  «Cередина 2010-х годов — время прорыва для якутского кинематографа. Как это произошло?» диэн кэпсэтиини ыытыаҕа. Манна киинэ кириитигэ Гульнара Абикеева, продюсердар Сардаана Саввина, Нина Кочеляева, режиссердар Владимир Мункуев, Степан Бурнашев уонна Любовь Борисова кыттыыны ылыахтара. Кэпсэтиигэ кыттыан баҕалаахтар регистрацияны ааһыҥ: сыылка.

Хаартыска — «Таайымаҥ тапталы» киинэттэн.

1
0
Telegram @edersaas20