Арҕаа дойдулар киинэ устар устуудьуйалара Арассыыйа киинэ тыйаатырдарыгар төннүөхтэрин баҕараллара билиннэ. Бу туһунан киинэ тыйаатырдарын бас билээччилэр Ассоциацияларын бэрэссэдээтэлэ Алексей Воронков иһитиннэрдэ.
“Улахан устуудьуйалар сааҥсыйа чэрчитинэн Арассыыйаҕа үлэлиир хонтуораларын саппыттара эрээри, киинэлэрин биһиги дойдубутугар көрдөрөртөн аккаастанар санаалара суох. Ол иһин, билигин атын ньыманан киинэни Арассыыйаҕа киллэрии туһунан үлэлэһэ сылдьаллар”, — диир Алексей Воронков.
Кини этэринэн Disney, Paramount, Sony, Warner Brothers курдук киинэ оҥорор хампаанньалар “параллельнай импорт” ньыматынан устуудьуйаларын кэнники үлэлэрин биһиги дойдубутугар киллэрэр былааннаахтар. Онон, сотору кэминэн аан дойду саҥа киинэлэрин Арассыыйа киинэ тыйаатырдара көрдөрөн барыахтарын сөп.