Атырдьах ыйын 22-28 күннэригэр Саха АССР 100 сылыгар анаммыт Го оонньууга Ил Дархан Кубогар маҥнайгы күрэхтэһии буолуоҕа.
Күрэхтэһиигэ 140 кыттааччы кыттара күүтүллэр, олортон 50 оҕо Арассыыйа атын эрэгийиэннэриттэн кэлиэхтэрэ. Ону таһынан икки күрэхтэһээччи Казахстантан уонна Польшаттан кэлиэхтэрэ.
“Го – түҥ былыргыттан кэлбит, мындыр өйү эрэйэр оонньуу. Бу оонньуу дьону киэҥник, бары өттүттэн сыныйан толкуйдуурга үөрэтэр” — диэн бу оонньууга бэйэтин сыһыанын туһунан Ил Дархан кэпсээн турардаах.
Тэрээһин сүрүн сыала-соруга – ыччаты сайыннарыыга уонна киэҥи эргитэн толкуйдааһыҥҥа угуйуу буолар.
Ил Дархан Кубогын уонна Уһук Илиҥҥи эрэгийиэн первенствотын арыйар тэрээһин «Өлүөнэ остуолбаларыгар» атырдьах ыйын 24 күнүгэр ыытыллыаҕа. Онно Кубок чэрчитинэн куораттааҕы Го оонньууга анаммыт бэстибээл саҕаланыа, маастар-кылаастар ыытыллыахтара, бу оонньууга дойду муҥутуур күүстээх оонньоочулара сеанстары ыытыахтара. Бары баҕалаахтар бу бэстибээлгэ кэлэн кыттыахтарын сөп.
edersaas.ru