Атырдьах ыйын 27-28 күннэригэр Комсомольскай болуоссакка сарсыарда 11 чаастан Genius Extreme диэн Го оонньуу бэстибээлэ буолуоҕа, кыайыылаахтары наҕараадалыахтара. Бэстибээл Ил Дархан Куубагын чэрчитинэн ыытыллар.
— Үгүстэр Го оонньууну билбэттэр, онон бэстибээл оҕолорго да, улахан да дьоҥҥо билиһиннэрэр сыаллаах. Бу стратегическай оонньуу толкуйдуурга, хас да хардыыны урутаан көрөргө үөрэтэр. Онон олоххо олус туһалаах. Азия дойдуларыгар салайар каадырдары бэлэмнээһиҥҥэ бу оонньууну туһаналлара мээнэҕэ буолбатах, — диэн Ил Дархан Айсен Николаев бэлиэтээн эттэ.
Комсомольскай болуоссакка бэстибээл кыттааччылара оонньуу быраабылатын, историятын билсиэхтэрэ. Санкт-Петербуртан, Владивостоктан уонна Москваттан тириэньэрдэр, инструктордар кэлэн үөрэтиэхтэрэ.
Ол эрээри бэстибээл бырагыраамата Го оонньуунан эрэ муҥурдаммат. Футболга, тхэквондоҕа, дзюдоҕа, оҕунан ытыыга, дартска, кросс-фитка, мас тардыһыытыгар маастар-кылаастар буолуохтара. Виртуальнай эйгэ, батут зоналара үлэлиэхтэрэ. Саахымакка, дуобакка, спортивнай наардаҕа күрэхтэһиилэри тэҥэ Үүнэр көлүөнэлэр пааркалара, «Алтан» It-оскуолата, кванториум IT-кулууба үөрэтэр презентациялары көрдөрүөхтэрэ.
Ыччакка URAAN, СНОУ ВОЙС, ICE TONE, AY-EN бөлөхтөр, Китджа, Люси ыллыахтара. Кэлбит дьон граффити уруһуйдуурга, ролигынан сүүрдэргэ, саҥа технологияларга, о.д.а. үөрэниэхтэрэ.
Го –императордар уонна полководецтар оонньуулара. Китайг — вэйци, Кореяҕа – бадук диэн ааттыыллар. Оттон Японияҕа “го” диэн – “тааһынан тулалаа” диэн суолталаах. Оонньуу ис хоһооно – утарылаһааччы сирин тааһынан тула эргийии уонна бэйэ сирин бөҕөргөтүү.
Урут Азия дойдуларыгар эрэ тарҕаммыт оонньуу буоллаҕына, ХХ үйэ саҕаланыыта арҕааҥҥы дойдуларга киэҥник биллибитэ. Бүгүҥҥү күҥҥэ Го оонньууну аан дойду үрдүнэн 60 мөлүйүөнтэн тахса киһи оонньуур.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru